МНР на Бугарија: Бугарка со двојно државјанство е осудена во Русија за „оправдување на тероризмот“ преку објави на социјалните мрежи

Министерството за надворешни работи на Бугарија потврди дека 32-годишната Р.Г. со бугарско и руско државјанство, е осудена во Русија на три години затвор во казнена колонија. Таа е прогласена за виновна за „јавно оправдување на тероризмот“ поради нејзини објави на социјалните мрежи, јавува БГНЕС.

Според информациите, Р.Г., која постојано живее во Русија, била уапсена во пролетта на 2025 година, а сигнал до бугарската амбасада во Москва испратила нејзината сестра. Амбасадата потоа доставила вербална нота до руското Министерство за надворешни работи и во мај добила потврда за нејзиното апсење.

Бугарското МНР наведува дека осудената не побарала конзуларна заштита од бугарските власти. На 9 септември 2025 година, руски суд ја осудил и испратил во казнена колонија.

Во пресудата се наведува дека нејзините објави, во кои Крим бил наречен „незаконски окупирана украинска територија“ и била изразена поддршка за украинскиот волонтерски корпус, претставуваат кривично дело според руските закони.

Министерот Георг Георгиев, во одговор до пратеникот Ивајло Мирчев, изјави дека случајот е дел од систематските дејствија на руските власти против слободата на изразување и пристапот до информации. Тој нагласи дека слободата на говор е основно човеково право и дека кривично гонење за јавно изразени мислења претставува сериозно прекршување на меѓународните норми.

Министерството за надворешни работи соопшти дека преку амбасадата во Москва продолжува да го следи развојот на случајот и е подготвено да обезбеди помош во рамките на дипломатските можности.