Мотокрос-спектакл во Самуилово со учесници од Бугарија, Грција, Србија и Северна Македонија

Над 120 мотоциклисти од Бугарија, Грција, Србија и Северна Македонија ќе учествуваат на мотокрос-натпреварот за Купот на Бугарија, што ќе се одржи на 10 и 11 октомври во селото Самуилово, во општина Петрич, јавува Пиринско.

Тренинзите се предвидени за 10 октомври, додека натпреварувачкиот дел ќе се одржи следниот ден на мотополигонот „ДЕНИ 518“.

На патеката ќе настапат едни од најдобрите мотокрос-натпреварувачи од четирите земји, кои ќе се борат за водечките позиции во различни класи.

Подготовките на патеката траат веќе 20 дена, а во нив се вклучени градоначалниците на осум села од областа Подгорие, како и десетици локални жители.

„Го чистиме секој сантиметар од патеката, треба да стане како терен за голф. Им благодарам за помошта и на колегите и на останатите волонтери. Мотокросот овде датира уште од 1969 година, по демократските промени имаше прекин, но од 2009 година повторно го обновивме овој натпревар, кој е препознатлив за нашето село, на целосно нова патека“, изјави градоначалникот на Самуилово, Кирил Стојанов.

Целиот комплекс се простира на површина од 300 декари, поради што неговото чистење и подготовка бараат подолг период.

На мотополигонот претходно е изградена систем за наводнување што покрива 90 проценти од просторот. Патеката е проектирана така што гледачите имаат целосна видливост кон натпреварувањето.

Должината на патеката, која се одржува во текот на целата година, изнесува 2,2 километри.