На Универзитетот во Виена е отворено второто издание на Климентовите денови на бугаристиката
Второто издание на Климентовите денови на бугаристиката беше отворено на 6 ноември во Институтот за славистика при Универзитетот во Виена. Програмата опфаќа предавања и дискусии посветени на бугарскиот јазик, книжевност и култура, а на нив учествуваат бугаристи и лектори од Австрија, Бугарија, Италија, Чешка и Словачка. Ова го соопшти Амбасадата на Бугарија во Виена на својата страница на Фејсбук, пренесува БТА.
Манифестацијата свечено ја отвори бугарската амбасадорка во Австрија, Десислава Најденова-Господинова, во присуство на претставници на раководството на Институтот, професори, студенти и гости.
Во своето обраќање амбасадорката ја истакна долгогодишната поддршка што бугарската амбасада ја дава за развојот на бугаристиката во Австрија. Таа им се заблагодари на организаторите на манифестацијата, д-р Иван Петров и Марчела Олејникова, кои предаваат бугарски јазик на Универзитетот во Виена, како и на раководството на Факултетот, на учесниците и на студентите.
Во име на Институтот за славистика се обрати проф. д-р Михаел Мозер. Проф. д-р Елена Крејчова од Универзитетот „Масарик“ во Брно говореше за значењето што пораките од моравската мисија на Константин-Кирил и Методиј го имаат и денес.
Во програмата на второто издание се предвидени и настапи на хоровите „Китка“, под раководство на Тања Александрова, „Пеење без ECTS“, под раководство на Лиса-Марија Горош, и „Јагода“, под раководство на Јонка Драгоманска.
