Научници од Техничкиот универзитет – Софија развиваат 6G технологии, модели за предвидување епидемии и систем за следење на стресот
Научници од Техничкиот универзитет – Софија работат на иновативни проекти во областа на 6G комуникациите, предвидувањето на епидемии и следењето на стресот, во рамките на проектот „Подобрување на научноистражувачкиот капацитет и квалитет за меѓународна препознатливост и одржливост на ТУ – Софија“ (BG-RRP-2.004-0005), јавува бугарскиот дневен весник 24 часа.
Истражувачката група „RECONNECTION“, предводена од проф. д-р Агата Манолова, развива технологии за холографска комуникација, тактилен интернет и автономен транспорт, кои ќе бидат основа на идните 6G мрежи. „Телекомуникациите се темел на дигиталната трансформација. Без нив, вештачката интелигенција, автономните системи и интелигентните градови не можат целосно да функционираат“, истакнува проф. Манолова.
Тимот веќе има објавено повеќе од 25 научни трудови во престижни меѓународни списанија и остварува активна соработка со научни институции од повеќе земји. Според проф. Манолова, најголем успех е развојот на младите истражувачи: „Вистинскиот успех на науката е кога ќе успеете да создадете следна генерација истражувачи.“
Паралелно, научници од ТУ – Софија и Универзитетот во Киншаса развиваат хибриден модел за предвидување на ширењето на епидемии, комбинирајќи математички модели и симулации базирани на вештачка интелигенција. „Токму така ги опфаќаме и микроскопското и макроскопското ниво на епидемијата“, објаснува проф. д-р Селенка Серека. Моделот има потенцијал да им помогне на носителите на одлуки при спроведување мерки за јавно здравје.
Во областа на здравството, тим предводен од доц. д-р Аделина Алексиева развива интелигентен систем за објективно следење на нивото на стрес во домашни услови. Системот ги анализира физиолошките параметри со помош на алгоритми на вештачка интелигенција и ги класифицира нивоата на стрес како ниски, средни или високи. „Принципот веќе е докажан. Доколку постои можност за калибрација со пошироки податоци, нашиот систем е подготвен за тоа“, вели Алексиева.
Истражувачите сега се насочени кон клиничка валидација и воспоставување партнерства со индустријата за претворање на развиените прототипи во практични решенија достапни за пошироката јавност.
