Панаѓуриште ја одбележува 170-годишнината од раѓањето на бугарската хероина Рајна Кнегиња

Бугарскиот град Панаѓуриште денес ја одбележува 170-годишнината од раѓањето на Рајна Кнегиња. Чествувањата вклучуваат низа придружни настани, а еден од акцентите е националната тркалезна маса организирана денес, која што ги собра на едно место творци, историчари и истражувачи на животот и делото на една од најзабележителните жени во борбите за ослободување на Бугарија.

Националната тркалезна маса се одржува во Историскиот музеј во Панаѓуриште.

Настаните посветени на делото на Рајна Кнегиња се дел од проект добиен од Општина Панаѓуриште, финансиран преку Планот за обнова и отпорност, изјави заменик-градоначалникот Ивајло Иванов.

Проектот „Рајна Кнегиња – 170 години инспирација и културно наследство за Панаѓуриште“ опфаќа низа настани. Меѓу нив се отворени часови за деца и возрасни, прикажување на техниката на везење на самото знаме на Априлското востание, изложби, мултимедијални претстави, средба со правнукот на Рајна Кнегиња – Асен Дипчев, со неговата поетска збирка „Вода и крв“, а кулминацијата е националната тркалезна маса, на која ќе се сретнат историјата и современите технологии како начин за зачувување на културното наследство.

Форумот започна денес во 13 часот локално време и е посветен на Рајна Попгеоргиева Футекова, прогласена од народот за Кнегиња. Модератор на форумот е директорот на Историскиот музеј во Панаѓуриште, доц. д-р Атанас Шопов.