Пет месеци без точна дијагноза: Лекари од Универзитетската болница – Бургас препознаа ретка инфекција што наликува на тумор

Ретка инфекција, која може да се помеша со малигно заболување и да остане непотврдена дури и со биопсија, дијагностицираа специјалистите од Клиниката за уво, нос и грло при Универзитетската болница – Бургас, јавува БНТ.
Случајот повторно ја потврди стручноста на Клиниката при сложени и невообичаени дијагнози, кај кои поединечните испитувања не даваат конечен одговор, а пресудни остануваат клиничката проценка и искуството на лекарот.

Пациентката има 89 години, а нејзините блиски пет месеци барале помош од различни специјалисти поради оток во пределот на лицето и вратот. Тој се појавил неколку месеци по поставувањето забна протеза која ги повредувала околните ткива. Отокот бил тврд и безболен. Лекарите препишувале различни антибиотици, но без траен резултат.

Снимањата покажале дека процесот ги зафатил не само меките ткива, туку и коската на долната вилица. На прв поглед, наодите можеле да упатуваат и на малигно заболување. Направената биопсија, меѓутоа, покажала само хронично воспаление и повторно не дала конечен одговор.

Токму поврзувањето на сите детали – повредата по поставувањето на протезата, долготрајниот развој на заболувањето, отсуството на ефект од кратките антибиотски терапии и особеностите на наодите од снимањата – ги насочило специјалистите за уво, нос и грло кон цервикофацијална актиномикоза.

Актиномикозата е ретка хронична бактериска инфекција. Ја предизвикуваат бактерии кои вообичаено се присутни во усната празнина, но при оштетување на слузницата можат да навлезат во подлабоките ткива. Една од особеностите на заболувањето е тоа што може да наликува на тумор и да го отежне поставувањето на дијагнозата. Бактериските колонии карактеристични за инфекцијата не биле откриени при првата биопсија, што е можно бидејќи се многу мали и се наоѓаат само на одделни места во зафатеното ткиво. Пообемна хируршка биопсија не била направена поради напреднатата возраст на жената и високиот оперативен ризик.

Лекарите започнале насочено антибиотско лекување. За само десет дена, отокот се намалил за повеќе од 70 проценти. По две недели интравенско и уште три недели перорално лекување, пациентката била следена шест месеци, без повторна појава на заболувањето.

Клиничкиот случај „Цервикофацијална актиномикоза – дијагностички и терапевтски аспекти“ бил разгледан на XXIII Светски конгрес по оториноларингологија и хирургија на глава и врат – IFOS 2026, одржан во септември во Истанбул. Ова е уште еден сложен случај што Клиниката за уво, нос и грло при Универзитетската болница – Бургас го претставила пред стручната јавност, активно развивајќи ја и својата научна дејност, покрај лекувањето на пациентите.