Пловдив ги претстави искуствата со вештачката интелигенција во училиштата на конференција во Софија

Општина Пловдив ги претстави своите образовни политики и искуства со примената на дигиталните технологии и вештачката интелигенција во училиштата на Националната конференција „Вештини за иновации во образованието“, соопшти Општината. Форумот се одржува на 6 и 7 ноември во Интер експо центарот во Софија, Бугарија, со учество на над 700 наставници, директори, универзитетски предавачи, технолошки експерти и претставници на институциите.

Заменик-градоначалникот на Пловдив задолжен за дигитализација, европски политики, деловен развој и образование, Пламен Панов, учествуваше на панелот „Ако вештачката интелигенција е иднината, кој ќе ја научи да биде човек? Успешниот пример на првата општина со ВИ“.

Во дискусијата беа претставени резултати од воведувањето современи технологии во пловдивските училишта, методи за обука на наставниците и учениците, како и пристапи за создавање безбедна и поттикнувачка образовна средина.

Учествуваа и Светлана Михајлова, менаџерка за дигитална трансформација за Централна и Источна Европа во Google for Education, и Елена Врзилова, наставничка по бугарски јазик и литература во Јазичната гимназија „Иван Вазов“ во Пловдив и раководителка на GEG Plovdiv.

Главна тема на конференцијата е зачувувањето на критичкото мислење, емпатијата и автентичното творештво кај децата во време на сè поширока употреба на вештачката интелигенција.

„Во 2026 година веќе не си го поставуваме прашањето: ‘Дали вештачката интелигенција ќе влезе во училиштата?’ Таа е веќе таму. Големиот предизвик денес е како да останеме луѓе во дигиталниот свет и како да ги научиме децата на автентично творештво, критичко мислење и отпорност“, посочија организаторите од Центарот за креативна обука.

Тие се повикаа на национално истражување на Бугарската асоцијација на софтверски компании (БАСКОМ) и Министерството за образование и наука, спроведено меѓу над 10.000 ученици и 1.700 наставници. Според нив, резултатите покажуваат дека генеративната вештачка интелигенција навлегува во училиштата побрзо од воспоставувањето официјални рамки за нејзина употреба, а учениците самостојно експериментираат со неа.

„Целта веќе не е само хардверот, туку подготвеноста на учениците — децата да бидат активни создавачи, а не пасивни корисници на алгоритми“, нагласија организаторите.

Од Општина Пловдив наведуваат и дека Јазичната гимназија „Иван Вазов“ пред една недела станала првото училиште во Централна и Источна Европа со статус Google Premier Reference School. Според соопштението, „Premier“ е највисокото ниво на признание во програмата на Google за референтни училишта.

Признанието било објавено на настанот „ВИ-штафета“, чиј домаќин била гимназијата, во рамките на целогодишниот натпревар „ВИ-училиште 2026/2027“. Натпреварот го спроведува Центарот за креативна обука со финансиска поддршка од Општина Пловдив.

Конференцијата ја организира Центарот за креативна обука, во соработка со Високото военопоморско училиште „Н. Ј. Вапцаров“ и бугарската фабрика за вештачка интелигенција BRAIN++, со поддршка и учество на бугарското Министерство за образование и наука и Европската комисија.

Форумот го отвори заменик-министерката за образование и наука, д-р Тања Панчева, а учесниците преку видеообраќање ги поздрави еврокомесарката за стартапи, истражување и иновации Екатерина Захариева.

Меѓу предавачите се истражувачот во областа на образованието проф. Сугата Митра, невронаучникот од Универзитетот во Гранада, д-р Жоан Пол Позуелос, и новинарката од Бугарската национална телевизија Аделина Радева. Програмата вклучува и панел-дискусии и практични работилници за наставници, наменети за размена на искуства и добри практики.