Почина Иван Стојанов, долгогодишен дипломат и просветен деец меѓу Бугарите во Молдавија и Украина

Почина Иван Трајков Стојанов, долгогодишен дипломат, педагог и општественик, кој значителен дел од својот живот ѝ го посветил на бугарската заедница во Молдавија и Украина. Веста ја соопшти Амбасадата на Бугарија во Молдавија на својата страница на Фејсбук, пренесува Радио Бугарија.

Иван Стојанов оставил траен белег во развојот на бугарското образование и културниот живот во Молдавија. Во 1994 година пристигнал во Тараклија како наставник во рамките на програмата за ангажирање бугарски просветни работници во странство. Покрај тоа што работел како наставник, тој бил и методичар по бугарски јазик при Реонскиот оддел за народно образование.

Со голема посветеност работел на зачувувањето на бугарскиот јазик, историјата, традициите и националниот идентитет. Активно учествувал и во организирањето културни манифестации и во обновувањето на бугарските празници и обичаи.

Во 1996 година бил меѓу првите наставници во новоотвореното Бугарско училиште во Кишињев, кое подоцна го добило името „Васил Левски“. Таму го вовел предметот „Историја, култура и традиции на бугарскиот народ“, придонесувајќи за образованието и воспитувањето на повеќе генерации млади Бесарабски Бугари.

Во текот на дипломатската кариера, Стојанов последователно служел како конзул во Киев, Одеса и Кишињев. Како негов придонес од историско значење се издвојуваат подготовката и организацијата на отворањето на првиот Конзулат на Бугарија во Тараклија во 2017 година – настан што долго го очекувала бугарската заедница во Молдавија.

Како прв конзул на Бугарија во Тараклија, Стојанов со голема посветеност им давал поддршка на бугарските граѓани и сонародници, претворајќи ја конзуларната служба во близок и сигурен партнер на заедницата.

Во текот на целокупната професионална и општествена дејност, Иван Стојанов бил препознатлив по високиот професионализам, човечноста и искреното сочувство за проблемите на Бесарабските Бугари. Со своето знаење, административно искуство и лична ангажираност им помогнал на голем број сонародници во Молдавија и Украина, како и по нивното враќање во Бугарија.

„Поклон пред споменот на Иван Стојанов! Неговото дело засекогаш ќе остане поврзано со бугарската заедница во Молдавија и со зајакнувањето на врските меѓу Бугарија и Бесарабските Бугари“, стои во објавата бугарската амбасада во Молдавија.