Потопот во Елените однесе жртва, хотелите се поплавени, автомобили се носат во водата

Потопот во туристичкото населено место Елените во Бугарија, каде што беше извршена евакуација и каде што се одвива спасувачка операција, однесе една жртва. Во Свети Влас нема загрозени луѓе. Ова го соопшти заменик-министерот за внатрешни работи Тони Тодоров, пренесува БГНЕС. Владата свика вонредна седница.

Повеќе од 10 екипи на противпожарната служба се на лице место во Елените. Повикани се екипи од Несебар и Поморие, како и нуркачи, специјализирана амфибија ( моторно возило кое може да се движи и по земја и во вода), вклучително и од Варна. Голем бран потопи хотели и згради. Автомобили се носеле по водата. Поплавниот бран во Елените потопи паркинг на комплекс од неколку згради.

Спасувачки екипи со високопроодна техника успеале да стигнат до хотелите и досега се евакуирани 6 жени, од кои три од Полска, а е пронајдено тело на еден маж во подземен кат на зграда. Продолжува пребарувањето на зградите од страна на спасувачките екипи. Неколку минути по 13 часот дождот престана.