(Видео)Потрагата по исчезнатото дете кај Пастух продолжува и во текот на ноќта

Потрагата по исчезнатото дете во реката Струма кај ќустендилското село Пастух продолжува и во текот на ноќта, откако по повеќечасовно пребарување тоа сè уште не е пронајдено, јавува БГНЕС.

„Нашите екипи ќе останат овде во текот на ноќта. Операцијата се отежнува од многу матната вода и од брзаците, кои се опасни за секој што би влегол да ги провери“, изјави Стефан Георгиев од дирекцијата „Помош и превенција при вонредни ситуации“ при Општина Софија.

Телото на едно од децата, девојче, било пронајдено доцна синоќа на околу 150 метри од местото на несреќата. Според надлежните, досега е пребарана голема површина од реката, а се разгледуваат повеќе можности за продолжување на акцијата, доколку тоа е безбедно за спасувачите.

Обласниот управител на Ќустендил, Атанас Гергинов, изјави дека екипите се на терен веќе 24 часа. „Продолжуваме со потрагата, поканивме да се вклучи и рафтинг клубот ‘Кресна’, а пред да се стемни повторно ќе ги пребараме реката и брзаците“, рече тој.

Вирот бил проверен со специјална машина за скенирање на дното, со лодки и дронови, а теренот пеш го пребарувале и пожарникарски патроли.

Несреќата се случила откако три деца на возраст од 8, 11 и 6 години заминале на пикник со баба им и дедо им, кои подоцна биле пронајдени мртви во реката. Сигналот за бедствање бил поднесен во петокот меѓу 17:20 и 17:30 часот, по што на местото пристигнале екипи на пожарната, полицијата, Планинската спасувачка служба и доброволци.

Причината за трагедијата засега не е позната.