Повеќе од 70 гајдаџии учествуваа на 23-от Национален гајдаџиски натпревар во родопското село Гела

Повеќе од 70 гајдаџии од Бугарија и од странство учествуваа на 23-от Национален натпревар во свирење гајда во родопското село Гела, со што годинашното издание стана најмасовно досега, јавува БГНЕС.

Уште од раните утрински часови, Илинденските полјани над родопското село беа исполнети со звуците на каба-гајдите и џура-гајдите. Рекордниот број учесници претставуваше сериозен предизвик за жирито, кое требаше да оцени десетици настапи и да ги избере најдобрите меѓу талентираните музичари.

Натпреварувачката програма ја отвори претседателката Илијана Јотова. Меѓу официјалните гости беа областниот управител на Смолјан, заменик-министерот за култура, градоначалници, пратеници и претставници на локалната и на државната власт.

Илјадници гости од земјата и од странство се собраа на Илинденските полјани, а кампинг-зоните околу собирот беа целосно исполнети. Немало доволно слободни места за сите кои сакале да престојуваат во природа во текот на трите фестивалски дена, соопштија организаторите од Фондацијата „Наследство во иднината“.

Кулминација на натпреварувачкиот ден беше борбата за големата награда „Дафо Трендафилов“, која втора година по ред се доделува во спомен на познатиот родопски гајдаџија, роден во Гела.

По завршувањето на главната натпреварувачка програма, жирито повика на дополнително индивидуално надсвирување двајца од најуспешните мајстори на каба-гајдата – Борислав Тонев и Ангел Згуровски.

Двајцата изведоа нови композиции пред жирито и публиката, а изборот на победникот остана неизвесен до последниот момент. По прецизното оценување, големата награда му беше доделена на Ангел Згуровски од Широка Л’ка, кој стана вториот добитник на признанието „Дафо Трендафилов“.

Наградата се наметнува како најпрестижно признание на Националниот натпревар во свирење гајда во Гела и како симбол на континуитетот меѓу генерациите кои ја чуваат и ја пренесуваат уметноста на родопската каба-гајда.

Еден од најемотивните моменти на годинашното издание беше настапот на Американецот Џејмс Коган, кој се претстави со изведба на родопска каба-гајда.

Неговото појавување на сцената покажа дека карактеристичниот звук на Родопите одамна ги надминал границите на Бугарија и привлекува почитувачи од различни делови на светот.

Џејмс Коган доби специјална награда од претседателот на Фондацијата „Наследство во иднината“ и главен организатор на Натпреварот на гајдаџии и Родовиот собир во Гела, Симеон Караколев.

Специјални признанија им беа доделени и на најмладиот и на највозрасниот учесник. Највозрасен гајдаџија годинава беше 81-годишниот Георги Червенков од Пловдив.

Во категоријата „каба-гајда“, први награди во првата возрасна група добија Стефан Иванов, Георги Муштанов и Георги Чилингиров. Во втората возрасна група првата награда ја освои Иван Атанасов, во третата Кирил В’лчанов, а во четвртата Ангел Згуровски.

Меѓу изведувачите на џура-гајда, првите награди им беа доделени на Стефан Иванов, Преслав Иванов, Христијан Најденов и Стојан Георгиев.

Настапите беа оценувани според музикалноста, техниката, стилот, сценското присуство и познавањето на традиционалната гајдаџиска уметност. Малите разлики меѓу најдобрите учесници го претворија изборот на победниците во една од најтешките задачи во историјата на натпреварот.

Натпреварот на гајдаџии и собирот на родовите во Гела започнаа во петокот и продолжуваат и денеска, 2 август. Последниот фестивалски ден е посветен на средбите на родовите, програмата со ора и заедничкото доживување кое секоја година обединува семејства, пријатели и почитувачи на бугарскиот фолклор.