Радев до Кошта: Бугарија активно придонесува кон основната визија на ЕУ за зајакнување на заедничката безбедност

Земјите членки на Европската Унија треба да бидат истрајни во барањето применливи и рационални решенија за надминување на кризата, изјави бугарскиот премиер Румен Радев по средбата со претседателот на Европскиот совет, Антонио Кошта, пренесе БГНЕС.

Радев рече дека на средбата биле разгледани прашањата поврзани со повеќегодишната финансиска рамка, проширувањето на ЕУ и гарантирањето на безбедноста на Европа.

„Повеќегодишната финансиска рамка е голем предизвик за ЕУ. Имаме високи амбиции за повеќе цели, но ресурсите се ограничени“, изјави Радев.

Според него, Бугарија ја поддржува визијата на ЕУ за посилен фокус врз конкурентноста и безбедноста, но тоа не треба да биде на сметка на политиките за проширување и кохезија, како и на заедничката земјоделска политика.

„Тие политики го гарантираат единството на ЕУ“, нагласи Радев.

Тој додаде дека било разговарано и за начинот на кој средствата за зголемување на конкурентноста треба да се распределуваат низ годините, така што сите земји членки да имаат еднаков пристап до кохезиските фондови и до важните европски финансиски инструменти.

Радев оцени дека земјите од ЕУ треба да ги обединат своите научни, технолошки и индустриски капацитети, додавајќи дека Бугарија активно придонесува кон заедничката европска визија за зајакнување на безбедноста и работи на развој на сопствената индустриска база.

Посебно внимание на средбата било посветено на транспортната, енергетската и дигиталната поврзаност.

„Треба да работиме за поголема поврзаност – транспортна, енергетска и дигитална. Драго ми е што со претседателот на Европскиот совет имаме заеднички идеи за идниот развој на оваа поврзаност“, рече Радев.

Тој посочи дека се разгледуваат и зелени енергетски коридори од Африка и Каспискиот Регион кои би минувале низ Бугарија.

„Антонио Кошта го разбира значењето на овие процеси и е нивен двигател. Ќе работиме заедно Бугарија да биде во фокусот на ЕУ кога станува збор за поголема поврзаност во иднина“, нагласи Радев.

Во однос на проширувањето, Радев изјави дека Бугарија е силен поддржувач на интеграцијата на Западен Балкан, но инсистира процесот да се темели врз индивидуалните заслуги на земјите кандидати.

„Ние инсистираме проширувањето да се заснова на сопствените заслуги и му благодарам на Антонио Кошта за разбирањето“, рече Радев.