Радев: Националната гарда е симбол на чест, достоинство и вистинско родољубие

Претседателот на Република Бугарија и врховен командант на вооружените сили, Румен Радев, го одликуваше командантот на Националната гарда, полковник К’нчо Иванов, со Почесен знак на претседателот, јавува БГНЕС. Одликувањето е признание за неговата долготрајна, посветена и достојна служба во редовите на Бугарската армија.

Свечената церемонија се одржа во зградата на воената единица, каде претседателот Радев изврши преглед на почесниот гардиски строј и се запозна со условите за обука и служба на гардистите.

„Со својата посветеност, компетентност и личен пример, полковник Иванов беше двигател и инспирација за целиот состав. Под негово водство, гардата стана симбол на чест, достоинство и вистинско родољубие“, истакна Радев. Тој посебно го нагласи значењето на иницијативите за вклучувањето на младите во школските гардиски одреди, како поттик на патриотизам за новите генерации.

Претседателот го пофали полковник Иванов и за неговите напори за подобрување на условите за работа и социјалниот статус на гардистите. Тој изрази надеж дека развојот на единицата ќе продолжи и по заминувањето на полковникот, кој наскоро го достигнува законскиот лимит за воена служба.

Полковник К’нчо Иванов е роден во Тројан на 8 август 1969 година, ја започнал својата служба во Националната гарда во 2001 година. Во текот на својата кариера извршувал бројни раководни должности, а од април 2019 година е назначен за командант на гардата. За време на службата, повеќепати е одликуван со воени признанија за верна и доблестна служба.

„Ова признание го прифаќам со гордост и чувство на одговорност – не како лична чест, туку како заслуга на сите гардисти со кои заедно ја извршувавме нашата мисија“, изјави полковник Иванов.

Националната гарда на Бугарија денес претставува еден од најрепрезентативните симболи на државата, нејзините вредности и традиции.