РУСИЈА ПОТВРДИ ДЕКА ЌЕ ГО ПРИМЕНУВА ДОГОВОРОТ ЗА ОТВОРЕНО НЕБО

Русија ја потврди намерата да го спроведува Договорот за отворено небо, за чија судбина ќе се одлучува на конференција на земјите членки на НАТО, соопшти руската мисија во НАТО по вонредниот состанок на Северноатлантскиот совет, пренесува Плусинфо.

Вонредната средба на НАТО беше свикана поради еднострани најави од САД дека ќе се повлече од Договорот за отворено небо.

– Руската страна ја потврди својата намера да продолжи да ги применува одредбите од договорот. Ние ја искажуваме нашата подготвеност за натамошен дијалог, што би се водел врз основа на взаемно почитување, а не на јазикот на ултиматумите, во интерес на европската и меѓународната безбедност, се вели во соопштението од руската мисија, јави ТАСС.

Во исто време, европските членки на НАТО ја пренесоа на САД нивната загриженост во врска со плановите на Вашингтон да се повлече од договорот на 35 земји, јавуваат британските медиуми, повикувајќи се на официјални неименувани извори на НАТО.

Администрацијата на американскиот претседател Доналд Трамп во четвртокот објави дека САД се повлекуваат од Договорот за отворено небо, кој им овозможува на државите потписнички да вршат невооружени летови за набљудување над териториите на другите држави потписнички.
Договорот беше потпишан пред 18 години заради зајакнување на довербата и спречување судири меѓу државите.

Вашингтон се повлекува од Договорот затоа што оценува дека Русија не се придржува на одредбите.