Софија ќе биде домаќин на Светското првенство за спортисти со Даунов синдром

Импресивно дрон-шоу и голема „Парада на нациите“ ќе бидат дел од свеченото отворање на Светското првенство за спортисти со Даунов синдром, кое ќе се одржи во Софија од 13 до 19 јуни. Во бугарската престолнина ќе настапат повеќе од 400 спортисти од 28 земји во пет спортови – атлетика, спортска гимнастика, ритмичка гимнастика, тенис и пинг-понг. Бугарија ќе биде претставена со 20 натпреварувачи во сите дисциплини, јавува БНР.

Празничната програма ќе започне во 19:00 часот со „Парадата на нациите“, која ќе тргне од плоштадот „Света Недела“ и ќе продолжи по булеварот „Витоша“ до просторот пред НДК, каде ќе биде поставена специјална сцена.

Свеченото отворање и концертната програма ќе започнат во 20:00 часот. Покровител на првенството е претседателката на Бугарија, Илијана Јотова, која ќе се обрати пред учесниците и гостите. На церемонијата ќе присуствуваат и министерот за млади и спорт Енчо Керјазов, градоначалникот на Софија Васил Терзиев, претседателот на Врховниот административен суд Љубомир Гајдов и претседателот на ФАФА Бугарија, Слав Петков.

Во концертната програма ќе настапат Криско, Љубо Киров и Марија Илиева со химната на првенството „Вие сте дел од нас“, а ќе учествуваат и Марија од формацијата „Таласамче“, мажоретскиот состав „Wonders“ и детскиот оркестар „Марширачки ѕвезди“.

Кулминација на вечерта ќе биде дрон-шоуто „Твоето лично небо“, кое ќе го осветли небото над Софија и ќе ја заокружи церемонијата на отворањето на Светското првенство.