Софиската филхармонија со концерт во чест на бугарскиот пијанист Венцислав Јанков
Шармантна програма ја очекува публиката вечерва во салата „Бугарија“ во Софија – кулминација на одбележувањето на 100-годишнината од раѓањето на големиот бугарски пијанист Венцислав Јанков, кој оствари впечатлива кариера во Франција, објави Бугарското национално радио (БНР).
Во емисијата „Метроном“ гостуваше Надежда Тодоровска, внука на Јанков и директорка на фондацијата „Венцислав Јанков“. Таа зборуваше за концертите во Софија и Париз на стипендистите на фондацијата, бидејќи токму тоа е заветот на големиот пијанист – да им се помага на талентираните млади музичари, како што некогаш му помогнале нему.
Венцислав Јанков ја освоил Гран при наградата на еден од најголемите пијанистички натпревари во светот, „Маргерит Лонг/Жак Тибо“, во времето кога самата Маргерит Лонг била членка на жирито. Наградата ја поделил со друг пијанист кој остварил извонредна кариера – Алдо Чиколини. Ова признание му донело стотици ангажмани за настапи во најпрестижните сали во Европа и светот.
Сто години по неговото раѓање, Софиската филхармонија му посветува концерт на неговото уметничко творештво и педагошко наследство. На 12 ноември во салата „Бугарија“ ќе настапат бугарскиот пијанист Људмил Ангелов и двајца истакнати француски музичари, ученици на Јанков – Клер Дезер и Франсоа Шаплен. Со оркестарот ќе диригира Росен Гергов.
Програмата е составена во духот на музиката поврзана со уметничкиот пат на Венцислав Јанков. Људмил Ангелов ќе ја изведе „Фантазијата“ за пијано и оркестар од Клод Дебиси, рано дело на големиот француски импресионист, во кое веќе се препознаваат неговите подоцнежни карактеристични хармонски бои и стремежот кон нов звучен простор.
Двајцата гостински пијанисти од Франција ќе го изведат Концертот за две пијана од Франсис Пуленк – едно од најомилените, највпечатливи и најблескави дела од овој вид, кое ги доловува боите на Париз од триесеттите години на XX век.
На крајот ќе биде изведена свитата од балетот „Жар-птица“ на Стравински, во верзијата од 1919 година – музика што ја претвора бајковитата приказна во раскошна оркестарска слика со необично богатство на тембри и ритми.
Роден во Софија во 1926 година, Венцислав Јанков го завршил музичкото образование во Софија и Берлин, а подоцна Париз станал негов дом. Одржал повеќе од 2.500 концерти на пет континенти и се афирмирал како изведувач со исклучителна звучна култура, интелектуална длабочина и чувство за музичката форма.
Нарекуван „поет и филозоф на пијаното“, Јанков оставил значајна трага и како професор на Парискиот конзерваториум. Меѓу неговите ученици се токму Клер Дезер и Франсоа Шаплен, кои денес се меѓу истакнатите имиња на француската пијанистичка школа. За нив, учеството на концертот е и личен гест на почит кон човекот што го обликувал нивното музичко размислување.
Концертот се организира во соработка со фондацијата „Венцислав Јанков“, под покровителство на Министерството за култура на Бугарија и Амбасадата на Франција.
