Софискиот дувачки оркестар одбележува 75 години од своето основање и еден век од раѓањето на својот основач Сашо Михајлов

Со концерт и проекција на документарен филм ќе бидат одбележани 75 години од основањето на Софискиот дувачки оркестар и еден век од раѓањето на неговиот основач Сашо Михајлов. Настанот ќе се одржи на 31 октомври во Домот на културата „Искар“ во Софија, соопштија организаторите, пренесува БТА.

Документарниот филм „75 години Софиски дувачки оркестар“ е посветен на историјата на составот, основан во 1951 година од Сашо Михајлов – негов прв и долгогодишен диригент. По проекцијата ќе се одржи свечен концерт под диригентската палка на Васил Делиев.

Во својата 75-годишна историја, оркестарот изгради репертоар што опфаќа класична, романтичарска и народна музика, како и оркестрации на дела од XIX и XX век. Некои од најпознатите бугарски композитори пишувале дела специјално за составот, наведуваат организаторите.

Музичарите настапувале во Германија, Чешка, Австрија, Унгарија, Швајцарија и Словенија, а меѓу изведувачите што учествувале во концертните програми се Људмил Ангелов, Теодосиј Спасов, Борислав Јоцов, Јилдиз Ибрахимова и Васил Петров.

Оркестарот е добитник на две први награди на меѓународните фестивали во Устер (Швајцарија) и Шиклош (Унгарија), како и на Почесниот знак на Општина Софија, „Кристална лира“ и „Златна монета“ – награда на Советот на европската научна и културна заедница.

Јубилејниот настан се реализира со финансиска поддршка од Националниот фонд „Култура“.