Современа уметност од 13 држави во Софија на Sofia Art Fair 2025
Вечерва официјално ќе биде отворено второто издание на Sofia Art Fair – единственото меѓународно изложение за современа уметност во Бугарија, организирано од Фондацијата „Софија дише“. Под мотото IMAGINE, форумот ќе обедини учесници од 13 држави и ќе ја претвори бугарската престолнина во место за меѓународен културен дијалог, јавува Actualno.
Својот поздравен збор на свеченото отворање ќе го одржи градоначалникот на Софија, г-дин Васил Терзиев. На церемонијата ќе бидат претставени сите учесници – галерии, уметници, куратори, како и говорниците во програмата SAF Talks 2025. Публиката ќе се запознае и со иницијативата Imagine more, која вклучува специјални акценти во придружната програма на Sofia Art Fair: кураторскиот проект „Проширени перспективи“, инициран од платформата Art and Culture Today; програмата Уметници во фокус, посветена на скулптурни, објектни и инсталациски дела кои предизвикуваат дијалог и внесуваат ново димензионално искуство во изложбата; како и Креативната детска зона, плус многу други активности.
Изложбата ќе биде отворена за посетители од 3 до 5 октомври, секој ден од 11:00 до 20:00 часот, во Иновацискиот форум „Џон Атанасов“ во Sofia Tech Park. Билетите се достапни преку sofiaartfair.art/tickets. Влезот е бесплатен за лица под 18 години и за лица со попреченост.
Sofia Art Fair 2025 нуди искуство исполнето со инспирација, нови откритија и дијалог кој ја поврзува Софија со светската сцена на современата уметност. Настанот е организиран од Фондацијата „Софија дише“ под покровителство на градоначалникот на Софија, г-дин Васил Терзиев, и е вклучен во Културниот календар на Град Софија за 2025 година. Се одржува со поддршка од Министерството за култура и Министерството за туризам на Бугарија, што ја нагласува неговата важност како културен и дипломатски фактор за развојот на земјата како дестинација за културен туризам.
