Станков: „Бугарија е клучен фактор за енергетската стабилност во Југоисточна Европа“
Во рамките на посетата на САД како дел од бугарската делегација за 80. седница на Генералното собрание на ОН, бугарскиот министер за енергетика Жечо Станков учествуваше на тркалезна маса на тема „Бугарија како дестинација за инвестиции“, јавува БГНЕС. Настанот, организиран од Делфискиот економски форум, го посетија и премиерот Росен Желјазков, министерот за животна средина и енергетика на Грција Ставрос Папаставру, како и претставници на американскиот и меѓународниот бизнис сектор.
Пред учесниците, меѓу кои имаше претставници на водечки меѓународни финансиски институции, бугарскиот министер за енергетика ги презентираше стратешките проекти што ја позиционираат земјата како значаен фактор во Југоисточна Европа.
„Во изминатата година постигнавме импресивна соработка со Грција во енергетскиот сектор, вклучувајќи ја и заедничката работа на Вертикалниот гасоводен коридор, поддржан од седум држави. Овој проект ќе овозможи пристап до течен природен гас од САД не само за Бугарија и Грција, туку и за Централна Европа, вклучувајќи ја Австрија,“ изјави Станков.
Меѓу стратешките приоритети, министерот ги истакна проектите за изградба на нови нуклеарни блокови со вкупен капацитет од 2 GW во АЕЦ „Козлодуј“. Американската Citibank веќе е водечка финансиска институција што ќе го координира обезбедувањето средства за изградбата на 7. и 8. блок. Дополнително, се предвидуваат четири нови хидроелектрани со пумпни акумулации за балансирање на мрежата, инвестиции во обновливи извори и изградба на батериски капацитети од 10.000 мегаватчаса за складирање на евтина фотоволтаична енергија.
Бугарија, со повеќе од 50 години искуство во нуклеарната енергетика, е подготвена да го прошири портфолиото и со мали модуларни реактори, како и да развие платформа за идни дата-центри. „Додека во други земји изградбата на вакви центри трае со децении, Бугарија може да понуди значително пократки рокови, што ја прави атрактивна за странски инвеститори,“ истакна министерот.
„Бугарија е и ќе остане сигурен извозник на енергија – со визија за иднината, стабилна инфраструктура и амбиција да го води енергетскиот преод во регионот,“ заклучи Станков.
