Стоматолозите бараат нови избори откако судот ја оспори законитоста на Комората
По одлуката на Управниот суд дека сегашното раководство на Стоматолошката комора не е легитимно, група стоматолози побараа итно распишување избори за ново раководство. Според нив, од пресудата произлегува дека сите одлуки донесени од актуелниот претседател се ништовни и дека Комората мора да се врати во рамките на законитото функционирање.
Актуелниот претседател на Комората, Маријан Денковски, изјави дека ќе ја почитува судската одлука и дека избори ќе се организираат, но нагласи дека, согласно закон, до нивното спроведување тој останува на чело на институцијата.
„Загрижените колеги би требало сериозно да размислат за нивните постапки, затоа што со обиди за незаконско преземање на Комората може да се отвори ’Пандорината кутија‘ што ќе доведе до несогледливи штетни последици по целиот стоматолошки систем,“ изјави Денковски.
Во јавноста, оваа одлука доаѓа по неодамнешната интервенција на Министерството за здравство, кое ѝ ги одзеде дел од ингеренциите на Стоматолошката комора поради сомнежи за финансиски неправилности и злоупотреби.
