Студенти од Американскиот универзитет во Бугарија со посета на Софија Тех Парк и HPE за развој на AI вештини

Студенти од Американскиот универзитет во Бугарија (АУБ) ги посетија Софија Тех Парк и канцеларијата на Hewlett Packard Enterprise (HPE) како дел од заедничка иницијатива што ги поврзува академијата и технолошката индустрија, јавува БТА.

Во рамки на посетата, студентите се запознаа со суперкомпјутерот Discoverer+ и со проектот BRAIN++, како и со нивната улога во развојот на екосистемот за вештачка интелигенција во Бугарија.

„Нашата улога како универзитет не е само да ги запознаеме студентите со вештачката интелигенција, туку да го развиеме нивното критичко мислење за овие технологии, за да можат да ги користат одговорно“, изјави проф. Соухан (Џек) Јун.

Иницијативата има цел да развие идни таленти и да создаде практични можности за професионална реализација. „Кога ќе го споиме теоретското знаење од академијата со реалните индустриски примени, подготвуваме нова генерација специјалисти“, додаде проф. Јун.

Студентите истакнаа дека ваквите посети им помагаат полесно да преминат од образованието во професионалната средина. „Ова ни дава реален контекст на она што го учиме“, рече студентката Александра Механџиска.

Од HPE нагласија дека ваквите иницијативи се клучни за развој на кадри: „Бугарија има силен потенцијал да биде клучен играч во развојот на AI решенија“, изјави Марија Косанова.

Посетата е дел од напорите за поврзување на образованието со практиката и за зајакнување на технолошкиот развој во Европа.