Бугарин е дел од раководството на манастирот Кикос во Кипар
Манастирот Кикос во Кипар привлекува поклоници од целиот свет, особено за време на големите христијански празници, каде се чува чудотворната икона на Пресвета Богородица. Меѓу посетителите има и многу Бугари, јавува БНР.
„Бугарска трага“ во манастирот остава и економот отец Максим, кој е со бугарско потекло и дипломец е на Пловдивскиот универзитет „Паисиј Хилендарски“. Тој раскажува дека уште како ученик, по првата посета во 2007 година, решил да му го посвети животот на манастирот: „Пред да завршам 12 одделение, не издржав и си реков дека сакам да се преселам во манастирот“.
Денес, како економ, тој управува со административните и економските активности на манастирот, кој функционира како самостојна институција и развива бројни социјални дејности – помош за сиромашни, домови за стари лица, деца и лица со попреченост.
„Манастирот не е аскетски. Ние сме отворен манастир и имаме социјално монаштво… Отворени сме за секој човек“, вели отец Максим, нагласувајќи дека установата има силна општествена улога.
