Трамп и Зеленски ќе се сретнат во Белата куќа на 17 октомври

Претседателот на САД, Доналд Трамп, ќе се сретне со украинскиот претседател Володимир Зеленски во Белата куќа на 17 октомври, потврди високопоставен украински претставник со директни информации за „Политико“, јавува БГНЕС. Средбата доаѓа во време кога Трамп покажува зголемена подготвеност за продлабочување на врските со Киев, по месеци на притисоци кон Украина да направи отстапки во војната со Русија.

Новината беше објавена ден по телефонскиот разговор меѓу двајцата лидери, во кој биле разгледувани можностите Украина да добие ракети „Томахок“. Ова оружје би ѝ овозможило на украинската армија да погодува цели во длабочината на руската територија. Трамп претходно ја одбиваше оваа идеја, стравувајќи дека може да доведе до понатамошна ескалација на конфликтот кој трае веќе три и пол години.

Односите меѓу Трамп и Зеленски значително се подобрија по тензичната средба во февруари, кога американскиот претседател и вицепретседателот Џеј Ди Ванс јавно го критикуваа Зеленски за тоа што, според нив, не покажал доволна благодарност за американската поддршка.

Во последните месеци Трамп направи промена во својот пристап кон Москва, откажувајќи се од стратегијата на „разбирање“ со рускиот претседател Владимир Путин. Во септември тој изјави дека Украина може да си ја врати својата територија, опишувајќи ја Русија како „хартиен тигар“, а за првпат јавно ја нарече Русија „агресор“ во војната.

Во интервју за „Фокс њуз“ на 12 октомври, Зеленски изјави дека успехот на Трамп во посредувањето за примирие во Газа му дава дополнителна увереност дека мир меѓу Русија и Украина е можно да се постигне. Тој додаде дека доколку Трамп успее во тоа, Украина би го номинирала американскиот претседател за Нобелова награда за мир.

„Ако тоа го направи, секако ќе го номинираме и со гордост ќе го поздравиме“, изјави Зеленски.