Три општини со бугарско население од Болградскиот Реон во Украина добија противпожарна опрема од Германија

Три општини со бугарско население од Болградскиот Реон во Украина — Арциската, Бесарапската и Буџачката — добија противпожарна опрема од Германија. Ова го соопшти Болградската реонска државна администрација на својата веб-страница, пренесува БТА.

Како што наведуваат од реонската администрација, донаторите се од германската добротворна организација „Ermstalhilft“, која и претходно им помагала на овие општини.

Кон крајот на октомври, германските партнери им предале четири противпожарни возила на противпожарните служби во наведените општини во Болградскиот Реон.

Оваа значајна поддршка од нашите меѓународни партнери е многу важна за нашиот регион, особено во сегашните тешки воени услови, посочуваат од Болградската администрација.

Бугарската заедница во Одеската Област е трета по бројност и брои над 150.000 луѓе, според последниот официјален попис во Украина. Во Одеса живеат околу 50–60 илјади Бугари. Најголемата концентрација на бугарско население е во Болградскиот, Измаилскиот и Белгород-Днестровскиот Реон.