Ученици од софиско училиште ќе донираат средства за настраданите во трагедијата во Кочани, Република Северна Македонија

Учениците од софиското училиште „Цар Симеон Велики“ ќе донираат средства за младите кои настрадаа и ужалените семејства по трагедијата во Кочани, Република Северна Македонија.

Традиционално, во пресрет на Велигденските празници, децата од основното училиште „Цар Симеон Велики“ организираат хуманитарен базар со рачно изработени сувенири, слатки и цртежи. Секоја година, со собраните средства, тие поддржуваат значајни каузи, со што активно учествуваат во јавниот живот на земјата и практично покажуваат дека „љубезноста“ не е само збор, туку и дело.

За прв пат оваа година учениците собраната сума ќе ја донираат во кауза надвор од Бугарија.

„Трагедијата што го снајде Кочани и цела Северна Македонија длабоко го потресе целиот наш тим. Учениците беа длабоко погодени од болката и страдањето на народот и заедно со нив решивме да ја смениме првично планираната кауза за базарот. Со оваа иницијатива сакаме да ја покажеме нивната солидарност и емпатија за семејствата на жртвите и да придонесеме за нивно побрзо закрепнување“, велат од училишниот тим.

„Секаде зборуваат за трагедијата во Кочани и моите соученици и јас сакаме да им помогнеме на жртвите и нивните семејства да закрепнат. Во нашето училиште има и ученици од Република Северна Македонија и на овој начин ги поддржуваме и нив бидејќи сме едно“, вели четвртоодделенецот Александар.

Базарот ќе се одржи на 17 април, а собраните средства ќе бидат префрлени на официјалната донаторска сметка за настраданите во кочанската трагедија.