Украина ја обвини Русија за „економски и хуманитарен терор“ во Црното Море

Украина побара итна седница на Советот за безбедност на Обединетите нации на 27 јули поради руските напади врз слободната пловидба во Црното Море, изјави украинскиот министер за надворешни работи Андриј Сибиха.

„Русија ја држи глобалната безбедност на храната како заложник. Само во последните неколку дена, Русија нападна најмалку три цивилни товарни бродови. Десетици членови на екипажот се убиени или повредени“, рече Сибиха, пренесува Укринформ.

Сибиха предупреди дека во екот на сезоната на жетва, ниту еден брод денес не поминал низ украинскиот поморски коридор во Црното Море и ја обвини Русија за намерен чин на економски и хуманитарен терор.

Во средата, Индија го повика рускиот амбасадор во Министерството за надворешни работи поради смртта на индиски морнар во Црното Море.

„Исто како што Иран ги нападна енергетските правци во Ормускиот теснец, Русија сега ги напаѓа глобалните прехранбени правци во Црното Море. Ако овој терор продолжи, милиони семејства во Африка, Азија, Блискиот Исток и Латинска Америка би можеле да се соочат со зголемување на цените на храната или глад“, предупреди Сибиха.

Тој ги повика сите земји, особено оние директно погодени од руските напади, веднаш да побараат од Русија да ги запре воените напади врз слободата на пловидба во Црното Море.

„Ниту една земја во светот не смее да гладува. Глобалниот притисок може да го запре рускиот терор“, рече Сибиха, цитиран од Танјуг.