Украинска делегација ќе го посети Вашингтон за да преговара за „Мега-договорот“ за оружје
Украинска делегација следната недела ќе ја посети американската престолнина Вашингтон за да преговара за купување на дополнителни системи за противвоздушна одбрана, како и на ракетни системи HIMARS, во рамки на таканаречениот „Мега-договор“. Ова го изјави украинскиот претседател Володимир Зеленски, јавува „Киев Индипендент“, пренесува БГНЕС.
Зеленски претходно најави дека Украина планира два големи договори со САД — „Мега-договорот“ за набавка на американско оружје и „Дрон-договорот“ за продажба на украински беспилотни летала на САД. Според првичните проценки, вредноста на договорот може да достигне и до 90 милијарди долари.
„Најважното во овој ‘Мега-договор’ се системите за противвоздушна одбрана. Подготвени сме да ги купиме и да користиме различни програми за тоа. PURL е една од нив,“ рече Зеленски, мислејќи на рамката за набавка на оружје под водство на НАТО.
Тој додаде дека партнерите разбираат колку е важно да се издвојат средства за противвоздушна одбрана, „пред сè американски системи, но не само“.
Изјавата доаѓа по масовниот руски напад врз украинската енергетска инфраструктура во ноќта меѓу 9 и 10 октомври, кога Русија употреби 32 крстосувачки и балистички ракети насочени кон украински градови. Украинската противвоздушна одбрана успеала да пресретне 405 руски дронови и 15 ракети, но во нападот загинало едно дете, а најмалку 24 лица биле повредени.
Делегацијата ќе ја предводи вицепремиерката и министерка за економија Јулија Свириденко, а во неа ќе учествуваат и шефот на кабинетот на Зеленски, Андриј Ермак, како и комесарот за санкции Владислав Власјук.
Зеленски исто така најави дека украинската страна ќе побара и модификации на ракетите ATACMS, чиј тип и карактеристики засега не се обелоденети.
