В’лчев: Ќе го олесниме пристапот на учениците од нашите неделни училишта во странство до бугарските универзитети

Бугарското Министерство за образование и наука ќе бара можности за олеснување на пристапот на учениците од бугарските неделни училишта во странство до универзитетите во Бугарија, како и за дополнителна поддршка на наставниците и приспособување на наставните материјали кон потребите на децата во странство. Ова го изјави министерот за образование и наука проф. Георги В’лчев на средба со тимот на бугарското училиште во Будимпешта, јавува БТА.

„Ќе ги бараме сите можности за олеснување на пристапот на учениците од нашите неделни училишта до бугарските универзитети, за дополнителна поддршка на наставниците и за приспособување на наставните материјали кон потребите на децата во странство“, рече В’лчев.

На средбата било разговарано за продолжувањето на образованието на учениците од бугарските училишта во странство на универзитетите во Бугарија. Претставниците на училиштето посочиле дека разликите во условите за пријавување и во начинот на признавање на резултатите од испитите по бугарски јазик создаваат тешкотии за дел од младите кои сакаат да студираат во Бугарија. Министерот уверил дека ќе се бараат решенија со кои ќе се земат предвид особеностите на наставата во неделните училишта и барањата на високообразовните установи.

Била разгледана и потребата од дополнителна обука и методолошка поддршка за наставниците, кои често работат со деца со различно ниво на познавање на бугарскиот јазик. В’лчев предложил следната година да се организира форум со претставници на бугарските училишта во странство, универзитетски професори и стручњаци по бугарски јазик, на кој ќе се разговара за подобрување на наставните материјали и методите на предавање.

На средбата биле отворени и прашања поврзани со финансирањето на бугарските неделни училишта и воведувањето пофлексибилни форми на настава.

Во бугарското училиште за мајчин јазик и детската градинка во Будимпешта учат повеќе од 150 деца и ученици. Училиштето работи и во Халастелек, Сигетсентмиклош и Сентендре.

Во Бугарските неделни училишта во странство се опфатени 401 училиште во 43 држави на шест континенти, со речиси 40.000 ученици и повеќе од 8 милиони евра државно финансирање.