(Видео) Бугарскиот премиер Росен Желјазков поднесе оставка на неговата влада

Владата во Бугарија предводена од премиерот Росен Желјазков поднесе оставка, јавува БГНЕС.

„Нашата коалиција се состана и го разгледа актуелниот момент, предизвиците со кои се соочуваме. Не се сомневаме дека изгласувањето недоверба нема да биде успешно. За нас одлуките на Народното собрание имаат смисла само кога ја изразуваат волјата на суверенот. Нашата желба е да бидеме на нивото што го очекува општеството. Дали граѓанското општество целосно ги сфаќа предизвиците пред кои сме исправени – тоа е друго прашање. Во овој момент власта произлегува од суверенот, тоа е гласот на народот. Ние, како што многупати истакнавме, го слушаме гласот на граѓаните кои протестираат. Затоа мора да бидеме на висина на нивните барања – оставка на владата. Граѓанската енергија треба да биде поддржана, бидејќи пред светот стојат бројни предизвици и мора да ги заштитиме демократските достигнувања за кои се боревме со децении“, изјави премиерот Желјазков.

Тој потсети дека кабинетот дојде на власт обединет околу целта Бугарија да продолжи по европскиот пат на развој. „Да бидеме на висина и да бидеме водечка европска држава значеше да влеземе во еврозоната и да ја завршиме евроинтеграцијата. Ветивме макроекономска стабилност и ја постигнавме. Го предложивме буџетот за 2026 година, кој беше насочен кон социјална заштита и придобивки за бугарските граѓани што треба да се зачуваат во следната година. Сето тоа не успеавме целосно да го објасниме или нашите политички опоненти не го разбраа, но тоа не е критика кон граѓаните што протестираат. Ова беше протест кој ја оценува исполнетоста на вредностите. Тоа е протест за вредности и ги обединува најразнородните сегменти од бугарското општество. Од тука натаму следува голем предизвик. Оваа влада нема да ја води Бугарија низ првите месеци од следната година. Протестите и нивните барања треба да ги изнесат своите автентични визии за тоа како ја гледаат управата на државата на изборите во 2026 година“, нагласи Желјазков, додавајќи дека ова прашање треба да им биде упатено од граѓаните до лидерите на протестите.

Тој информираше дека доколку парламентот не го усвои буџетот до крајот на месецов, владата ќе поднесе предлог за привремен буџет.

„Поднесуваме оставка“, изјави премиерот.

Оставката беше соопштена непосредно пред гласањето за шестото гласање на недоверба, поднесен од коалицијата ПП–ДБ поради економската политика на кабинетот.