(Видео) Дан Колов: Бугарска гордост, благородништво и митска моќ

„Сакам да се борам како Бугарин и сакам да умрам како Бугарин“. Ова е одговорот на легендарниот бугарски борач Дан Колов на многуте понуди за промена на државјанството што ги добива од Французи и Американци, јавува БГНЕС.

На 27 декември се навршуваат 132 години од раѓањето на еден од најголемите спортисти во историјата на Бугарија, кој со митската сила што ја демонстрирал на тепихот за борење ги освоил Европа и светот. „Тој е нашата гордост. Не само за селото, за околијата, туку за цела Бугарија. Тој е најсилниот човек. Можеби ќе се роди посилен, но никогаш нема да има поблагороден или подарежлив“, вели Иваничка Петрова, кустос во Куќата-музеј на Дан Колов во селото Сеник. Музејот е сместен во родната куќа на Колов.

Дан Колов забележал над 1500 победи и само неколку порази на тепихот. Меѓу најљубопитните факти за Колов се дека бил доен до тригодишна возраст, ја одбил понудата на Ал Капоне да стане негов телохранител, а најпозната е неговата победа над страшниот јапонски борач наречен Давителот. Бестрашниот Бугарин отишол во Јапонија, каде што го избегнал неговиот зафат и го победил. Поради ова, тој бил исфрлен од земјата, но во Америка бил пречекан како херој поради ривалството меѓу двете земји.

„Четири пати му било понудено да го промени своето државјанство. Тој велел дека ако е француски или американски државјанин, ќе биде најнесреќната личност. За него ова беше неговото мото во животот, бидејќи вели – сакам да се борам како Бугарин и како Бугарин сакам да умрам. Најважна му била Бугарија“, вели Петрова.
„Неговиот најголем противник и најголем пријател е Французинот Анри Деглан. Во 70-тите години тој дошол на гробот на Дан Колов, плачел цело време. На сите заеднички фотографии се прегрнати и се смешкаат“, се сеќава таа.

Благородноста и дарежливоста на Ден Колов се пословични. Со своите вештини успева да заработи многу пари во САД и великодушно ги донира во Бугарија. „Се зборува дека донирал 543.000 долари за бугарските студенти кои студираат во странство, за сираците, за луѓето кои настрадале во војната. Никого не одбил. Сите го паметат како многу благороден“, вели Иваничка Петрова.

Дан Колов го напуштил овој свет млад – починал на 47-годишна возраст од туберкулоза. Но, неговата желба да биде погребан во селото каде што е роден – Сеник е исполнета.