(Видео) Фон дер Лајен: Само врз основа на сопствени заслуги земјите од Западен Балкан ќе станат дел од ЕУ

Само врз основа на сопствени заслуги земјите од Западен Балкан ќе станат дел од ЕУ. Секоја земја избира дали сака или не сака да биде дел од Унијата. Ова го изјави претседателката на ЕК Урсула фон дер Лајен како одговор на прашањето на новинарот на БГНЕС Димитар Русков:

„Реалистично ли е системот за безбедност, кој Европската унија во моментот го гради со превооружување и други мерки, да биде одржлив тука, во Црноморскиот регион и на Балканот, имајќи ја предвид политиката на отворениот руски сојузник Србија и обидите за дестабилизација на Босна и Херцеговина, Северна Македонија и Црна Гора — сите земји кандидати за членство во Унијата? Дали ги земате предвид овие ризици?

Во тој контекст, дали му рековте на г. Христијан Мицкоски дека нема да добие „план Б“ за европската интеграција на Северна Македонија?“

Фон дер Лајен потенцира дека проширувањето на Унијата останува приоритет за да се гарантира безбедноста на континентот:

„Проширувањето е во интерес на ЕУ. Поголема, поконкурентна и побезбедна ЕУ значи Европа со посилен глас во светот.“

„Во втор план, како што рековте вие — мешањето на други сили, конкретно Русија, на Западен Балкан, а и во Молдавија — бара ние да стоиме зад нашите пријатели и партнери, да ги поддржиме и зајакнеме, да се борат против тие хибридни напади и мешањето кое тие го трпат. Треба да им дадеме можност за слободен избор — дали сакаат или не сакаат да бидат дел од ЕУ“, додаде таа.

„Проширувањето е и ќе остане процес заснован на заслуги. Јасно е што треба да се заврши, подобрувањата кои треба да се постигнат. Секој кандидат ќе биде оценет според условите кои важат за него. Тоа создава доверба од двете страни. Проширувањето одзема време. Сакам да повторам дека е клучно за Европа, за регионалната стабилност и безбедност да работиме напорно за успешно проширување“, заврши претседателката на ЕК.