(Видео) Проф. д-р Ангел Димитров: Бугарските политичари не треба да одговараат на сè што е кажано во Северна Македонија

Дводневната седница на Заедничката мултидисциплинарна експертска комисија за историски и образовни прашања меѓу Бугарија и Северна Македонија заврши без суштински напредок, изјави бугарскиот копретседател на Комисијата, проф. д-р Ангел Димитров за БТВ. Следната средба е предвидена во Скопје на почетокот на ноември.

„Четири и пол години нема новости. Новоста е дека нема новости“, изјави Димитров, оценувајќи ги разговорите како тешки.

Според него, тоа не значи дека на седниците нема дискусии. Тој рече дека разговорите се интензивни, но разликите меѓу двете страни и натаму се премногу големи за да се дојде до решенијата за кои е формирана Комисијата.

Како пример, Димитров ја посочи тезата дека Бугарија и Северна Македонија имаат „заедничка историја, но различна меморија“. Тој нагласи дека поимот „заедничка историја“ е наведен во преамбулата на Договорот за пријателство, добрососедство и соработка меѓу двете држави.

Димитров ги отфрли и тврдењата дека работата на бугарската страна во Комисијата е водена од политички интереси.

„Единствената политичка цел е да го исполниме она што договорот го предвидел за работата на Комисијата“, изјави тој.

Во врска со идејата за посредник меѓу Софија и Скопје, Димитров оцени дека станува збор за политичка идеја која, според него, има цел да им покаже на граѓаните на Северна Македонија дека владата може да постигне промена без да се придржува до веќе постигнатите договори и до позициите на европските институции.

Тој ги повика и бугарските политичари да реагираат внимателно, но јасно кога тоа е потребно.

„Нашите политичари навистина би требало да реагираат соодветно. Не треба да се одговара апсолутно на сè што е кажано од другата страна на границата, но кога е неопходно, треба да има многу јасен и категоричен одговор“, рече Димитров.

Следната седница на историската комисија ќе се одржи во Скопје на почетокот на ноември, најверојатно во четврток и петок во првата недела од месецот, според Димитров.