(Видео) Средба Радев-Мицотакис: Бугарија и Грција се оска на стабилност за регионот и за Европа

Бугарија и Грција ќе работат на долгорочно решение за прашањето со прекуграничните води, забрзување на енергетската и транспортната поврзаност и продлабочување на одбранбената соработка. Ова беше договорено на средбата меѓу бугарскиот премиер Румен Радев и неговиот грчки колега Киријакос Мицотакис во Софија, јавува БГНЕС.

Мицотакис нагласи дека е потребен долгорочен договор за водите на реките Арда и Марица, што е важно за земјоделството и за справувањето со климатските промени. „Треба да го разгледуваме ова прашање долгорочно за да можеме да ги планираме неопходните инвестиции“, изјави тој.

Двајцата премиери оценија дека односите меѓу Бугарија и Грција достигнале ниво на стратешко партнерство. Радев истакна дека трговската размена меѓу двете земји достигнала речиси 6 милијарди евра, додека грчките инвестиции во Бугарија изнесуваат околу 1 милијарда евра.

Во фокусот на разговорите беа и енергетската безбедност и развојот на Вертикалниот гасен коридор. Според Радев, Бугарија ги исполнува обврските за зголемување на капацитетот за пренос на природен гас од Грција кон Централна и Источна Европа.

Лидерите разговараа и за подобрување на транспортната поврзаност, вклучително и модернизација на железничките врски и подобро искористување на северногрчките пристаништа. Мицотакис ја поддржа идејата за нов копнен коридор што би ги поврзал грчките пристаништа со Украина преку Бугарија и Романија.

Во областа на безбедноста, двете земји ја потврдија намерата за продлабочување на соработката во рамките на НАТО и европската одбрана, како и заедничка работа во одбранбената индустрија, вклучително и во развојот на дронови и антидронски системи.