Влада на Република Бугарија: Повлекувањето од изградбата на основните компоненти на Коридорот VIII ја ослабува колективната безбедност на Алијансата

Владата на Република Бугарија со зголемена вознемиреност ги следи изјавите и декларациите на официјални претставници на Република Северна Македонија насочени кон кршење на меѓународните обврски во областа на инфраструктурното поврзување, вкл. со пренасочување на европските фондови за изградба на железничката компонента од Коридорот VIII кон друг транспортен проект, стои во официјалната позиција на Владата на Република Бугарија во однос на изјавите на официјални претставници на Република Северна Македонија за пренасочување на средства за изградбата на Коридор 8 кон друг транспортен проект.

Потсетуваме дека Република Северна Македонија во повеќе наврати ја презеде и потврди својата посветеност за инфраструктурно поврзување на двете земји, вкл. Коридор VIII – на пример во Договорот за добрососедство од 2017 година и неговите протоколи од 2019 и 2022 година, Меморандумот за разбирање меѓу Албанија, Бугарија и Северна Македонија од октомври 2021 година, заедничката декларација на Албанија, Бугарија, Италија и Северна Македонија од ноември 2023 година , декларациите од Самитот на НАТО од јули 2024 година итн.

Трансевропскиот коридор VIII не само што ја поврзува Република Северна Македонија со Бугарија, туку има за цел да ја зголеми геостратешката автономија на ЕУ. Коридорот, исто така, станува клучна логистичка рута долж јужното крило на НАТО од Јадранот до Црното Море и е од големо значење во сегашниот геополитички момент. Повлекувањето од изградбата на основните компоненти на Коридорот VIII ја ослабува колективната безбедност на Алијансата.

Република Бугарија во повеќе наврати го покрена прашањето за изградба на Коридорот VIII на највисоко ниво и успешно лобира за обезбедување на европски средства за негова изградба, вкл. за Република Северна Македонија. Благодарение на бугарските напори, Коридорот VIII е вклучен во опфатот на европскиот транспортен коридор „Западен Балкан – Источен Медитеран“ како приоритет за ЕУ. На крајот на 2023 година, делницата Крива Паланка – Деве Баир беше определена од ЕУ како еден од шесте водечки проекти на стратегијата „Глобален портал“ и е финансирана со над 500 милиони евра грантови и заеми. Модернизацијата и комплетирањето на железничката компонента на Коридорот VIII на бугарска територија е дел од националната програма „Транспортна поврзаност 2021 – 2027 година“.

Ја повикуваме владата на Република Северна Македонија одговорно и со добра волја да пристапи кон сите преземени обврски и договори со цел навремена изградба на делниците од трасата на Трансевропскиот Коридор VIII на нејзина територија, стои во позицијата на бугарската влада.