Владата на Бугарија донесе одлука за формирање на Центар за иновации во одбраната

Владата на Бугарија донесе одлука за формирање на Центар за иновации во одбраната, кој ќе биде сместен во рамките на „Софија Тех Парк“ АД. Новиот центар ќе служи како клучна точка за тестирање на нови технологии и развој на прототипи, со фокус на дронови и напредни одбранбени системи, јавува БГНЕС.

Центарот ќе ги користи стратешката локација, модерната инфраструктура и иновативната екосистема на „Софија Тех Парк“ за поттикнување на технолошкиот напредок, економскиот раст и зголемување на улогата на Бугарија во полето на одбранбените иновации, соопштија од владината прес-служба.

Преку партнерство со Институтот за одбрана „Проф. Цветан Лазаров“, Центарот ќе ја усогласи научно-истражувачката и развојна дејност со националните воени приоритети. Ќе се интегрира експертски капацитет и ќе се работи на заеднички решенија кои ќе ги унапредат одбранбените способности на земјата, а воедно ќе придонесат кон безбедносните цели на НАТО и Европската Унија.

Исто така, Центарот ќе поттикнува соработка помеѓу стартапи, мали и средни претпријатија, меѓународни компании, универзитети и државните институции, позиционирајќи ја Бугарија како конкурентен учесник на меѓународниот пазар на одбрана. Се очекува резултатите од работата на Центарот да бидат пазарно релевантни и технолошки авангардни.

За поефикасна координација помеѓу институциите и Центарот, ќе се формира Координациски совет со претставници од Министерството за иновации и раст, Министерството за одбрана и Министерството за економија и индустрија, согласно наредба на заменик-претседателот на владата.

Финансирањето на Центарот ќе се обезбеди преку европските фондови за споделено управување и ќе биде вклучено во тековните измени на програмите за кои е надлежно Министерството за иновации и раст.