„ВМРО останува без сојузник во ЕУ“ – реакција на СДСМ по падот на Орбан

Опозициската СДСМ реагира по изборите во Унгарија, оценувајќи дека граѓаните избрале европски курс наместо, како што наведуваат, автократија.

„Унгарија ја избра Европа наместо Русија. Граѓаните јасно и гласно рекоа: доста е автократија“, стои во соопштението.

Од партијата посочуваат дека по 16 години владеење, паднал режимот на Виктор Орбан, а победата на Петер Маѓар ја оценуваат како „победа на демократијата над автократијата и на владеењето на правото над корупцијата“.

СДСМ наведува дека со овој исход, како што велат, нивните политички противници остануваат без сојузник во Европската Унија, при што го споменуваат и случајот со Никола Груевски.

„Криминалната организација ВМРО останува без својот единствен сојузник во Европската Унија. Нема повеќе криење на Никола Груевски во Будимпешта, тајни бизнис-комбинации, ниту кинески пари кои доаѓаа преку тој режим. Паѓаат автократските режими. Следен е Александар Вучиќ, а со него и Христијан Мицкоски“, велат од СДСМ.

Во соопштението се додава дека падот на Орбан е порака за целиот регион и дека, како што велат од партијата, „времето на автократите завршува“.