Во чест на донорите: Засадени 14 рози во „Градината на донорите“ зад НДК во Софија

Во чест и благодарност кон донорите на органи и нивните семејства, денеска во „Градината на донорите“ зад Националниот дворец на културата (НДК) во Софија беа засадени 14 рози, пренесе БГНЕС.

„Секоја година традиционално се собираме зад НДК за да засадиме рози во спомен на донорите на органи. На настанот присуствуваа роднини на донори и претставници од Агенцијата за медицински надзор. За жал, во моментов немаше присутни трансплантирани лица. Оваа година засадуваме 14 рози – по една за секој донор од 17 октомври 2024 до 17 октомври 2025 година. Вчерашниот ден беше последниот донорски случај, четиринаесеттиот по ред“, изјави Християн Ѓошев од Извршната агенција за медицински надзор.

Во моментов, 875 лица во Бугарија чекаат на трансплантација на орган. Ѓошев нагласи дека донорството е благороден чин и повика јавноста да разговара повеќе за оваа тема. „Колку повеќе луѓето се информирани, толку полесно се согласуваат нивниот близок да биде донор. Направивме социолошко истражување кое покажа дека сè повеќе млади луѓе го поддржуваат донорството, што е позитивен знак“, рече тој.

„Градината на донорите“ е создадена во 2020 година од Агенцијата за медицински надзор и Министерството за здравство, по иницијатива на Здружението на пациенти со респираторна инсуфициенција и белодробна трансплантација. Од тогаш, секоја година по традиција се засадуваат рози во чест на донорите и нивните семејства.