Во Германија ќе се одржи предавање за над 60 бугарски уметници кои се школувале во Минхен

Бугарското друштво „Соединение Хајлброн“ во Германија на 13 ноември ќе организира предавање посветено на бугарските уметници во Минхен. Предавач на настанот, кој ќе се одржи од 18 до 20 часот по локално време на адреса Ludwigsburger Str. 66, 74080 Heilbronn, ќе биде графичката дизајнерка и илустраторка Кристина Тужарова.

„Повелете заедно да се нурнеме во светот на бугарската уметност. Ве покануваме на инспиративна средба со бугарската уметност и историја! Ќе го проследиме патот на над 60 бугарски уметници кои се школувале на Минхенската ликовна академија и ќе откриеме како нивниот престој во Германија придонел за развојот на модерната бугарска уметност“, наведуваат од здружението на Фејсбук.

Од тимот додаваат дека по предавањето ќе има време за прашања, разговори за уметност и книги, како и можност за купување изданија од серијалот за бугарските уметници. Според организаторите, настанот е наменет за возрасни и деца над 10 години, пренесува БТА.