Во Париз за прв пат ќе се одржи празник на бугарската роза

Празник на бугарската роза ќе се одржи на 27 јуни за првпат во Париз, соопштија од Бугарското неделно училиште „Иван Вазов“ во француската престолнина, јавува БНР.

Настанот ќе се одржи од 14:00 до 19:00 часот по локално време во балската сала на општината на 13. париски округ, на плоштадот „Италија“ број 1. Пред официјалното отворање, училиштето ќе го одбележи крајот на учебната година.

Во рамките на програмата ќе бидат наградени истакнатите учесници на Меѓународниот литературен конкурс „Волшебното перо“ 2026, а посетителите ќе можат да се запознаат со проектот за бугарските трговци со розово масло во периодот на Преродбата.

Ученици од училиштето ќе претстават паноа посветени на трговијата со розово масло, изработени во рамки на проект поддржан од Министерството за образование и наука. Ќе биде поставена и изложба со бугарски знаменитости.

Програмата предвидува народни песни и танци, музички настапи, квизови и творческо ателје за деца за цртање рози. Посетителите ќе можат да разгледаат и купат производи поврзани со бугарската маслодајна роза, меѓу кои розово масло, розова вода, козметика, чај, свеќи, слатко и сувенири.

Специјален гостин на празникот ќе биде Царица Роза, како дел од делегацијата на општината Казанлак во Бугарија.