Во Софија започна меѓународен курс посветен на безбедноста и одбраната во Црноморскиот регион

Во Софија денеска започна петдневен курс за Заедничката безбедносна и одбранбена политика на Европската Унија, со фокус на Црноморскиот регион. Учествуваат 46 лица од Бугарија и од уште 18 држави, како и службеници на Европската служба за надворешно дејствување, соопшти Дипломатскиот институт при Министерството за надворешни работи на Бугарија.

Курсот на тема „Соработката во Црноморскиот регион во рамките на актуелната европска безбедносна архитектура“ го организира Дипломатскиот институт, под покровителство на Европскиот колеџ за безбедност и одбрана и со поддршка на Воената академија „Г. С. Раковски“.

Обуката ги опфаќа актуелните геополитички состојби, предизвиците за европската безбедност и стратешкото партнерство во рамките на НАТО, со посебен акцент на безбедноста и одбраната во Црноморскиот регион.

Предвидена е и практична вежба со разработка на сценарија за спротивставување на хибридните закани во регионот.

Предавачи се бугарски и странски експерти, а едно од клучните излагања ќе го одржи Анер Зуковиќ, виш советник во Советот за регионална соработка во Југоисточна Европа.

На отворањето учествуваа директорката на Дипломатскиот институт, Тања Михајлова, заменик-началникот за наставна и научна дејност на Воената академија, полковник доцент Петар Маринов, и Ралица Ковачева, државен експерт во Дирекцијата за одбранбена политика и планирање при бугарското Министерство за одбрана.

Меѓу учесниците има претставници од земји на ЕУ, од Источното партнерство и од Црноморскиот регион. Дипломатскиот институт наведува дека со Европскиот колеџ за безбедност и одбрана одржува долгогодишно активно партнерство, во чии рамки досега се организирани повеќе заеднички курсеви и семинари за бугарски и странски учесници.