Во украинското бугарско село Криничное ќе се одржи третиот културен форум „Обредните лебови – наследството на Чушмелии“

Третиот културен форум „Обредните лебови – наследството на Чушмелии“, посветен на зачувувањето и популаризацијата на традициите поврзани со обредните лебови на Бугарите во Бесарабија, ќе се одржи на 1 ноември во бугарското село Криничное (Чушмелиј) во Болградскиот регион, Украина. Веста ја сподели Татјана Ковтун, наставничка по бугарски јазик, историја и литература, како и активен општествен деец и промотор на културното наследство, на својата страница на Фејсбук, пренесува БТА.

Настанот ќе ги обедини локалните мајстори, истражувачи и претставници на културни заедници од регионот.

Првиот форум на обредниот леб се одржа во Криничное на 20 октомври 2024 година. Во разговор за БТА, Ковтун објасни дека идејата за организирање на ваков форум се родила по посетата на празникот на лебот во Ќустендил, Бугарија, кој ги инспирирал учесниците да ја возобноват традицијата и во своето родно место.

Иницијативата добила поддршка од локалната општина, а целта на организаторите била да се оживеат и пренесат на идните генерации богатите христијански традиции поврзани со печењето на леб.

За време на првиот форум, учесниците ги споделија своите идеи и идни планови, а беа одржани и мајсторски часови за подготовка на леб за децата, со цел тие да се запознаат со вековните обичаи на лебопекарството. Настанот заврши со фолклорен концерт, на кој настапија локални ансамбли и солисти од селото и општината.

Селото Криничное (Чушмелии) се наоѓа во Одеската област на Украина и е едно од селата со доминантно бугарско население. Според пописот од 2001 година, 93,28% од жителите го навеле бугарскиот јазик како мајчин.