Вселенскиот патријарх Вартоломеј со пофалби за бугарските евромонети со ликот на Св. Јован Рилски, патријархот Даниил ќе ја предводи литургијата во црквата „Св. Стефан“

Вселенскиот патријарх Вартоломеј упати високи пофалби до Бугарија за одлуката на нејзините евромонети да биде прикажан ликот на Свети Јован Рилски, оценувајќи ја како силна духовна и цивилизациска порака упатена не само до Европа, туку и до целиот свет. Тој ова го истакна во својот говор по заедничката света литургија со бугарскиот патријарх Даниил, кому му се обрати со титулата „Неговото Блаженство, софиски митрополит и патријарх на цела Бугарија“.

Патријархот Вартоломеј нагласи дека влегувањето на Бугарија во еврозоната од 1 јануари следната година добива особена духовна димензија преку изборот на ликот на свети Јован Рилски на националните евромонети. Според него, тоа сведочи за нераскинливата врска на бугарскиот народ со православната вера и испраќа јасна порака дека економијата не смее да се води само од „алгоритми и студени пресметки“, туку мора да биде втемелена врз божествената икономија – љубовта и почитта кон човекот.

„Економијата што го занемарува Бога и духовната димензија на човекот неминовно води кон распаѓање на општественото ткиво и не придонесува за вистински напредок“, истакна Вселенскиот патријарх, додавајќи дека изборот на свети Јован Рилски испраќа порака за христијанското разбирање на парите – не како средство за себично збогатување, туку како израз на љубов и служба кон другиот.

Тој потсети дека и византиските монети често го носеле ликот на Христос Спасителот, нагласувајќи дека и денес таа симболика има силно значење. „Ништо друго не ни преостанува освен да ја пофалиме оваа примерна иницијатива и да посакаме нејзината порака да биде разбрана насекаде“, рече Вартоломеј.

Во својот говор тој се осврна и на животот на православните верници во Истанбул, нагласувајќи дека под покровителство на Вселенската патријаршија живеат верници од различни националности, меѓу кои и бројни Бугари, кои уживаат целосна пастирска грижа и почит кон нивниот јазик и традиција. „Тука нема веќе ни Јудеј ни Елин, туку сите сме едно во Христа Исус“, истакна тој, повикувајќи се на зборовите од Посланието до Галатјаните.

Патријархот Вартоломеј потсети и на пораката од одбележувањето на 1700-годишнината од Првиот вселенски собор во Никеја, нагласувајќи дека Црквата е повикана да сведочи за Христос во свет исполнет со неправди, војни и поделби, и да придонесе за духовно обновување и единство.

На 27 декември, бугарскиот патријарх Даниил ќе ја предводи светата литургија по повод храмовата слава на бугарската црква „Св. Стефан“ во Истанбул, позната како „Железната црква“. Посетата се реализира по покана на Вселенскиот патријарх Вартоломеј и претставува прво мирно патријаршиско патување на патријархот Даниил по неговиот избор и интронизација.

На свеченоста ќе присуствува и потпретседателката на Бугарија, Илијана Јотова, по покана на бугарската православна заедница во Турција. Во поновата историја на Бугарската православна црква, сите нејзини поглавари во изминатите осум децении оствариле вакви братски посети на Вселенската патријаршија и на другите помесни православни цркви, како израз на единство и заедничко сведоштво на верата.