Желјазков до Зеленски: Бугарија продолжува да ги поддржува напорите на Украина за воспоставување праведен и траен мир
Бугарија продолжува да ги поддржува напорите на Украина за воспоставување на праведен и траен мир. Ова го изјави премиерот Росен Желјазков за време на неговата средба со украинскиот претседател Володимир Зеленски, јавува БГНЕС. Нивниот разговор е дел од серијата на билатерални средби што премиерот Желјазков ги одржа во Тирана, каде што се одржува Шестата средба на врвот на Европската политичка заедница.
Според премиерот Росен Желјазков, воспоставувањето на мир не е само начин да се запре војната во Украина и да се обнови нејзиниот територијален интегритет. Тоа е прашање поврзано со безбедноста на Европа и начинот на кој Европа во новата геополитичка средина ќе ја изгради својата безбедносна архитектура и своите одбранбени капацитети, истакна Желјазков.
Во текот на разговорот со претседателот Зеленски, премиерот Желјазков ја нагласил важноста на зајакнувањето на индустрискиот воен потенцијал на Европа како дел од структурните гаранции и за Украина, но и за европскиот континент.
На средбата беше разгледан и текот на преговорите. Прекинувањето на огнот е една од неопходните предуслови за мировни преговори за воспоставување на јасен и праведен мир и за Украина, и за мирот на европскиот континент, беше категоричен бугарскиот премиер. Според Желјазков, поставувањето било какви предвремени услови може да ја поткопа кревката надеж што постои на почетокот на овие преговори.
