Желјазков: Оценката на ЕК е важна за стабилноста на бугарските финансии и одржливоста на економијата

Ja oчекуваме одлуката на Европската централна банка и на Европската комисија за извештаите преку кои ќе добиеме оценка за подготвеноста на Бугарија да го воведе еврото од 1 јануари 2026 година. Оваа оценка е исклучително важна за бугарското општество, бидејќи е резултат на децении напори за постигнување висок степен на финансиска и економска конвергенција со развиените европски земји. Ова го изјави премиерот Росен Желјазков, пренесе БГНЕС.

Ова е оценка за стабилноста на бугарските финансии, за одржливоста на бугарската економија и за нејзината способност. Но, пред сè, ова е оценка за напорите на бугарското општество, кое уште во 90-тите години го изрази својот непоколеблив пат да биде достоен член на Европската унија и дел од Европа.

Ако ги оставиме настрана политичката реторика и политичките страсти, ние како прагматична влада имаме неколку основни задачи во наредните месеци, а тие се: да го направиме процесот на воведување на еврото предвидлив, да ги разбиеме стравовите што се наметнуваат кај луѓето и кои се користат за политичка злоупотреба, да дадеме сите гаранции дека недобронамерните трговски практики нема да најдат почва, рече Желјазков.

За таа цел, денес ќе донесеме две одлуки – првата е создавање на механизам на владино ниво за адресирање на сите прашања поврзани со соработката со стопанските комори, работодавачките организации, синдикатите и сите оние што произведуваат стоки и услуги, за да нема стравувања дека ќе има неоправдано зголемување на цените, како и да се врши постојан надзор врз тоа уште многу пред воведувањето на еврото, посочи премиерот.

За таа цел ќе усвоиме и нацрт на таков меморандум, ќе го создадеме тој механизам и во следните денови ќе одржиме средби со сите организации, асоцијации, работодавачи и синдикати. Од вчера Националната агенција за приходи, Комисијата за заштита на потрошувачите и Комисијата за заштита на конкуренцијата, согласно нивните надлежности, вршат претходна контрола во однос на сите стоки и услуги што се дел од потрошувачката кошничка. Контролата ќе биде постојана и ќе се спроведува во партнерство со производителите, добавувачите и трговците на мало.

Оваа контрола ќе биде дел од нашето разбирање дека бугарската економија не претпоставува неоправдано зголемување на цените и сите можности за шпекулација, недобронамерни трговски практики, картелизирање и злоупотреба на монополска положба ќе бидат многу јасно адресирани. Тоа ќе се случи во партнерство, се разбира, со субјектите што ќе бидат страни во договорот што ќе го потпишеме и се надевам дека тоа ќе даде уште еден поттик на бугарската економија, на соработката меѓу државата и бизнисот во корист на граѓаните, појасни Желјазков.

Информативната кампања за еврото започнува шест месеци пред ефективниот датум, па затоа кампањата допрва ќе започне да добива сила, за сите граѓани, особено ранливите групи, да бидат добро информирани и да не се злоупотребуваат нивните стравови. Благодарност до секој еден од вас по секторите во однос на секторската политика и односите со бизнисот, изјави уште Желјазков.