36 држави ќе се натпреваруваат на „Евровизија 2027“ во Бургас

Европската радиодифузна унија (EBU) го потврди списокот на јавните радиодифузни сервиси што ќе се натпреваруваат на изборот за песна на „Евровизија 2027“ во мај во Бугарија, пренесува БНТ.

36 радиодифузни сервиси, со публика од 600 милиони луѓе, ќе испратат песни и изведувачи во Бургас за 71. издание на најголемиот музички настан во светот – еден повеќе во споредба со 2026 година.

Натпреварот ќе се одржи од 11 до 15 мај 2027 година во „Арена Бургас“, а домаќин е Бугарската национална телевизија.

Првпат на натпреварот ќе учествува CBC/Radio-Canada, откако стана полноправна членка на EBU во јули 2026 година, а МРТ од Северна Македонија се враќа по четиригодишно отсуство.

RTVE (Шпанија) и RTVSLO (Словенија) сè уште не одлучиле дали ќе учествуваат на изборот за песна на „Евровизија 2027“. Земајќи ја предвид сложеноста на прашањето, EBU одлучи да им даде рок на двата радиодифузни сервиса до декември да го потврдат учеството.

Радиодифузните сервиси што ќе учествуваат на 71. издание на изборот за песна на „Евровизија 2027“ се:

RTSH (Албанија),
AMPTV (Ерменија),
SBS (Австралија),
ORF (Австрија),
İctimai (Азербејџан),
VRT (Белгија),
БНТ (Бугарија),
CBC/Radio-Canada (Канада),
HRT (Хрватска),
CyBC (Кипар),
DR (Данска),
ERR (Естонија),
YLE (Финска),
FT (Франција),
GPB (Грузија),
ARD/SWR (Германија),
ERT (Грција),
KAN (Израел),
Rai (Италија),
LSM (Латвија),
LRT (Литванија),
RTL (Луксембург),
PBS (Малта),
TRM (Молдавија),
RTCG (Црна Гора),
МРТ (Северна Македонија),
NRK (Норвешка),
TVP (Полска),
RTP (Португалија),
TVR (Романија),
SMRTV (Сан Марино),
RTS (Србија),
SVT (Шведска),
SRG SSR (Швајцарија),
Суспільне (Украина),
BBC (Обединетото Кралство).

31 од учесниците ќе бидат распределени во две полуфиналиња. Жиријата и гледачите заедно ќе изберат 10 песни што ќе се пласираат во финалето од првото полуфинале на 11 мај, вторник, и 10 песни од второто полуфинале на 13 мај, четврток.

Овие 20 песни ќе им се придружат на директно пласираните претставници на БНТ, FT (Франција), ARD/SWR (Германија), Rai (Италија) и BBC (Обединетото Кралство) во големото финале на 15 мај, сабота.

Гледачите од сите земји учеснички, како и од остатокот од светот, заедно со жиријата назначени од 36-те радиодифузни сервиси учесници, потоа ќе гласаат во големото финале за да го изберат победникот на 71. издание на натпреварот.

Извлекувањето на ждрепката, со кое ќе се утврди во кое полуфинале ќе биде изведена секоја песна, ќе се одржи во Бургас во јануари следната година.

Мартин Грин, директор на изборот за песна на „Евровизија“, изјави:
„Изборот за песна на ’Евровизија‘ отсекогаш бил повеќе од натпревар што ги започнува кариерите на нови изведувачи и промовира стотици нови песни секоја година. Во свет што изгледа сè поподелен, натпреварот ја обединува публиката преку музиката, надминувајќи ги границите, јазиците и културите, а тоа е поважно од кога било. Се радуваме што првпат ќе го пречекаме CBC/Radio-Canada на натпреварот, како и што повторно ќе ѝ посакаме добредојде на МРТ од Северна Македонија. Тие им се придружуваат на уште 34 јавни радиодифузни сервиси и нивните изведувачи во Бургас, како и на публиката ширум светот, за да го прослават она што навистина значи да бидеме ’Обединети од музиката‘.“

Генералната директорка на БНТ, Милена Милотинова, коментираше:
„Бугарија со нетрпение очекува да ги пречека учесниците и сите обожаватели што ќе дојдат специјално за да ги следат спектаклите во живо. Ќе работиме на тоа да обезбедиме неверојатно доживување и за гледачите пред екраните, и за публиката во салата, и за сите гости во прекрасниот Бургас. Изборот за песна на ’Евровизија‘ не е само низа концерти, туку светски настан што преку музиката ги поттикнува луѓето да откриваат нови места и пријателства. Веруваме дека не само во Бургас, туку и во сите други катчиња на Бугарија што ќе ги посетат нашите гости, ќе најдат пријатна атмосфера, убавина и повод повторно да се вратат во Бугарија. Ве очекуваме!“

Градоначалникот на Бургас, Димитар Николов, додаде:
„Ве очекуваме во Бургас – таму каде што морето се среќава со музиката, а Европа наоѓа уште една причина да биде заедно! Им честитам на сите учесници на изборот за песна на ’Евровизија 2027‘! Вие ја претворате музиката во јазик што нема граници и ги обединува луѓето. За мене како градоначалник, за мојот тим и за сите жители на Бургас е задоволство да бидеме дел од големата музичка емоција. Ајде заедно да гледаме напред кон оваа возбудлива авантура. Ве очекуваме со возбуда и со гостопримството со кое нашиот град ги пречекува своите нови пријатели!“

ОБЕДИНЕТИ ОД МУЗИКАТА

Изборот за песна на „Евровизија“ и понатаму претставува отскочна штица за брз успех на светската сцена и неспоредлива платформа за нова музика.

Приближно половина од учесниците на натпреварот секоја година се избираат преку национални финалиња во земјите учеснички, па така над 450 нови песни и стотици нови изведувачи ѝ се претставуваат на публиката уште пред почетокот на натпреварот во мај.

Натпреварувачките песни бележат огромен број стримувања и надвор од самиот настан.

Во 2026 година, 35-те песни од годинешното издание на натпреварот собраа речиси 600 милиони репродукции од јануари до август на сите достапни платформи за аудио и видеостриминг. Од нив, 16 песни се стримувани повеќе од 10 милиони пати.

Победничката песна на 70. издание на изборот за песна на „Евровизија“ – „Бангаранга“ на ДАРА, која БНТ ја избра да ја претставува Бугарија – била репродуцирана 80 милиони пати од јануари до август 2026 година и го достигнала првото место на топ-листите во 11 земји, се пласирала меѓу првите пет во пет земји и меѓу првите десет во уште пет.

БИЛЕТИ ЗА БУРГАС

Билетите за вкупно девет настани: завршните настапи во живо и претходните пробни шоуа со публика, ќе бидат пуштени во продажба на почетокот на 2027 година. Повеќе детали ќе бидат објавени на eurovision.com/tickets. Обожавателите што сакаат да купат билети за настапите во Бургас треба да се регистрираат во Eurofan, официјалната бесплатна програма за членство на обожавателите на натпреварот.

Повеќе детали за дизајнот на сцената, водителите и настаните што ќе се одржат во Бургас паралелно со 71. издание на изборот за песна на „Евровизија“ ќе бидат објавени во наредните месеци.

БНТ првпат е домаќин на изборот за песна на „Евровизија“ во Бугарија, по победата на ДАРА со песната „Бангаранга“ во Виена во 2026 година. Во 2015 година, БНТ беше домаќин на Детската Евровизија во Софија.

НОВИ ПРАВИЛА ЗА 2027 ГОДИНА

Како што беше објавено во август, по годишната оценка на EBU и повратните информации од членовите на организацијата, раководното тело на изборот за песна на „Евровизија“ одобри низа измени на правилата за 71. издание.

Од 2027 година, сите изведувачи мора да имаат најмалку 18 години на денот на својата прва проба, наспроти досегашната возрасна граница од 16 години, со цел да се зајакнат мерките за безбедност и заштита на помладите изведувачи од притисокот на натпреварувањето. Во правилата за звукот беа внесени појаснувања – не е дозволено резервните снимки да го заменуваат или прекумерно да го потпомагаат вокалниот настап во живо.

Се воведува нова клаузула за домаќинството, во случај вооружен конфликт, чувствителна геополитичка ситуација или друга околност значително да влијае врз сигурноста, безбедноста или стабилноста на земјата или регионот на радиодифузниот сервис победник на натпреварот. Ако радиодифузниот сервис не може да биде домаќин на настанот во безбедни услови, EBU ќе назначи друг радиодифузен сервис за домаќин, кој ќе ги преземе сите обврски поврзани со домаќинството.

Овие измени имаат цел да обезбедат поголема јасност за сите што учествуваат и се ангажирани во изборот за песна на „Евровизија“ и да придонесат настанот да остане безбеден и гостопримлив, истовремено зачувувајќи ги неговиот дух и интегритет.