Јотова го постави прашањето за правата на македонските Бугари пред Советот на Европа
Потпретседателката на Бугарија Илијана Јотова го постави прашањето за правата на македонските Бугари на најголемиот форум за заштита на човековите права во Европа.
Јотова го презентираше систематското газење на правата на Бугарите во Република Северна Македонија на генералната дебата „Обединети за Европа“, што се одржа во рамките на IV состанок на Советот на Европа. Во контекст на основните принципи на организацијата за почитување на човековите права, потпретседателката потсети на серијата случаи на агресија врз луѓето во РСМ поради нивниот деклариран бугарски идентитет, како и на усвојувањето на специјалниот закон против здруженијата, соопшти прес-службата на бугарскиот претседател.
„Во Република Северна Македонија има црни списоци на Бугари, на кои не им е дозволен влез на територијата на државата. Во нив без никаков аргумент има и бугарски европратеник. Ова е груба провокација кон заедничките европски вредности и кон сè што ја гради нашата заедница – единство, солидарност, меѓусебно почитување. Најопасен тренд е раширениот говор на омраза кон соседна земја, членка на Советот на Европа и Европската унија“, нагласи Илијана Јотова.
Потпретседателката Јотова ја потврди бугарската позиција против војната во Украина и поддршката за нејзиниот суверенитет, независност и територијален интегритет. „Ја осудуваме континуираната агресија на Русија против Украина“, рече Јотова. Потпретседателката ја истакна бугарската поддршка за создавање на Регистар на штетите предизвикани од војната во Украина. Јотова ја потпиша завршната декларација на IV Самит на Советот на Европа, која ги потврди принципите на организацијата за демократија и почитување на човековите права, ја поддржа Украина со акцент врз украинските деца.
Потпретседателката го повика Советот на Европа внимателно да ги приспособи своите цели и активности во однос на поголемиот број предизвици во сложената геополитичка средина.
