Петровска: Северна Македонија е кредибилен сојузник, кој инвестира во националната и во колективната одбрана
Министерката за одбрана, Славјанка Петровска, денеска, се сретна со директорот на Директоратот за одбранбено планирање во алијансата, Карл Форд, кој заедно со својот тим учествува на редовните билатерални консултации помеѓу Република Северна Македонија и НАТО.
На состанокот министерката Петровска порача дека Северна Македонија е посветен и активен НАТО-сојузник, кој дава суштински придонес во рамките на колективната безбедност.
„Со придонесот во мултинационалните сили на НАТО во Латвија, Романија и во Бугарија, македонската Армија ја зацврстува колективната безбедност и безбедноста на секој граѓанин на алијансата. Ние остануваме посветени и на регионалната безбедност кон која придонесуваме преку нашето учество во мисијата на НАТО во Косово, КФОР“, рече министерката.
Петровска додаде дека Северна Македонија ќе продолжи да инвестира во својата Армија, а доказ за тоа е фактот дека в година 2 процента од домашниот бруто-производ ќе бидат одвоени за одбрана, од кои една третина за модернизација и опремување.
Директорот за одбранбено планирање, Форд, го поздрави придонесот на Северна Македонија кон колективната безбедност, а особено во рамките на мултинационалните сили на НАТО во источното крило.
За време на билатералните консултации, кои вчера и денеска од страна на Министерството за одбрана ги предводеше државниот секретар Владимир Анчев, се разговараше за напредокот во имплементацијата на доделените НАТО-цели на способности во рамките на повеќе области, како одбранбената политика, финансиите, копнените сили, логистиката, воздухопловните сили, специјалните сили, капацитетите за стабилизација и реконструкција, како и цивилната подготвеност.
