Д-р Петар Ораховац-единствениот странец, кој бил претседател на бугарскиот парламент, доби улица со своето име во Ловеч

Претседателот на Црна Гора, Јаков Милатовиќ, официјално ја откри улицата во Ловеч која го носи името на д-р Петар Ораховац.
Со овој чин се изразува почит кон големиот хуманист, лекар и политичар, чие дело оставило трајна трага во историјата на Бугарија и Црна Гора, пренесува БГНЕС.

Д-р Петар Ораховац е роден во 1857 година во селото Орахово, Црна Гора, дипломирал медицина во Москва во 1883 година. Во 1884 година се преселил во Бугарија и станал еден од основачите на Бугарскиот лекарски сојуз, истовремено активно учествувајќи во политичкиот живот на земјата. Во периодот од 1910 до 1911 година, тој бил претседател на Народното собрание на Бугарија, единствениот странец што ја извршувал оваа функција.

„Отворањето на улицата во Ловеч, која го носи неговото име, претставува знак на почит кон неговата работа и достигнувања што ги надминуваат границите на една држава, потсетувајќи на заедничката историја и вредности кои ги поврзуваат Црна Гора и Бугарија. Овој настан е доказ за одличните и пријателски односи меѓу двете земји“, соопштија од кабинетот на претседателот. Црна Гора има почесен конзул со седиште во Ловеч.

Животот и активностите на д-р Петар Ораховац се нераскинливо поврзани со Бугарија, особено со Ловеч, каде што се населил во 1884 година. За време на неговиот престој, тој оставил значителен белег врз медицинската грижа во градот, а истовремено придонел и за развојот на здравственото дело во Бугарија. Во 1892 година учествувал во основањето на локалната болница која подоцна го носела името на Стефан Стамболов. Во 1894 година, заедно со д-р Стефан Ватев, го започнал издавањето на првото месечно научно медицинско списание во Бугарија – „Медицина“, чие прво издание било објавено токму во Ловеч. Д-р Ораховац бил иницијатор на движењето за воени инвалиди и активно учествувал во политичкиот живот во Бугарија како пратеник во три парламенти и претседател на Народното собрание.