Старата бугарска престолнина Трново повторно царува: Европа доаѓа на фестивалот на средновековното секојдневие

За десетти пат по ред, фестивалот „Секојдневието на средновековниот Трновград“ ќе се одржи од 6 до 8 јуни и ќе собере учесници од различни делови на Европа, со цел да го реконструира начинот на живот и настаните во градот како што биле во периодот помеѓу XII и XIV век, кога Трново бил главен град на Второто Бугарско Царство и еден од трите најзначајни европски градови – заедно со Рим и Цариград.

„Со костумите и оружјето, кампот е навистина импресивен, бидејќи учесниците ќе престојуваат во свои шатори и шатри, поставени на тврдината Царевец“ – објаснува Нелина Ц’рова од Општина Велико Трново, директор на Дирекцијата за култура, недвижно културно-историско наследство, празници и фестивали, во изјава за Бугарското национално радио (БНР), и додава:
„Таму може да се видат, на пример, Италијанци облечени како крстоносци – со шатори украсени со карактерните знамиња. Ова едноставно не може да се опише со зборови – тоа мора да се види! Посетителите директно се допираат до начинот на живот на средновековниот човек – во шаторот нема кревет, туку четири фрлени кожи на подот. Навистина, Царевец оживува за тие три дена во XII–XIV век.“

Темата на фестивалот годинава е „SACRA TERRA“ (света земја), а програмата е посветена на 840-годишнината од востанието на Асен и Петар и обновувањето на Бугарската држава. Настаните ќе бидат претставени во дворскиот комплекс на тврдината со свечен театарски спектакл на Музичко-драмскиот театар „Константин Кисимов“ – Велико Трново. Фестивалот започнува со поклонение во храмот „Свети Четириесет Маченици“.

Во програмата се вклучени реконструкции и демонстрации на занаети, традиции и обичаи – како што се ревии на средновековна мода и претставувања на облека од епохата, реконструирани по слики и фрески. Ќе има и средновековно судство според историски документи, театарски спектакл „Последниот патријарх“, и активности за деца- стрелање со лак, работа со керамика и куклен театар за приказни од времето на Трновското царство.

Се разбира, во програмата има и многу борбени игри и демонстрации на средновековни борбени техники, а музичката програма вклучува два концерта на групата Notte Medievale, кои ќе создадат магична атмосфера на тврдината.

Нелина Ц’рова додава за БНР дека организацијата секогаш започнува веднаш по завршувањето на претходниот фестивал и дека секоја година пристигнуваат многу странци – добро информирани и силно заинтересирани да го видат „во живо“ она што го прочитале во книгите. Тие што не биле запознаени со историјата се длабоко импресионирани кога ќе дознаат дека Трново бил трет најзначаен град во Европа во XII–XIV век.

„Во текот на годините сме имале учесници од разни земји – Романија, Србија, РС Македонија, Италија, Украина, Германија и други. Главниот партнер на општината е здружението ‘Трновци’ – кои преку долгогодишно искуство и контакти успеваат да ги поканат најдобрите учесници, правејќи го секое следно издание подобро од претходното.

Фестивалот денес е на високо европско ниво и е привлекува токму поради тоа што настаните се реконструираат на самото место каде што навистина се случиле – нешто што малку фестивали во Европа можат да го понудат. Тоа создава уникатна атмосфера – истовремено магична, величествена и полна со историско значење“, заклучува Ц’рова во изјава за БНР, неколку дена пред Велико Трново и неговите гости да отпатуваат назад низ времето во средновековна Бугарија.