Проф. Михаил Станчев: „Формулата е Украина во НАТО без НАТО“
Формулата за иднината на Украина е „Украина во НАТО без НАТО“, за да не се провоцираат Владимир Путин и Доналд Трамп. Ова го изјави за БНР проф. Михаил Станчев, универзитетски професор од Харков и дипломат, по средбата во Вашингтон меѓу Трамп и украинскиот претседател Володимир Зеленски.
Станчев нагласи дека Киев треба да престане да политизира околу членството во НАТО и истакна дека клучно е вклучувањето на САД во обезбедувањето на украинската безбедност. Тој предложи Украина да добие статус на сојузник на САД надвор од НАТО, слично на Израел.
Според него, Украина разбира дека засега нема да може да си ги врати Крим и Донбас, а најтешко прашање ќе биде дали ќе се повлече од Донбас.
Станчев оцени дека средбата во Вашингтон е пообнадежувачка од таа во Аљаска, кога „Трамп сакаше да му се додвори на Путин“. Тој додаде дека Зеленски веќе не е истиот лидер од пред половина година, бидејќи овојпат пристигнал со цел тим европски лидери кои ја балансирале средбата.
Во однос на можната идна билатерална средба меѓу Москва и Киев, Станчев предупреди дека нивото на претставеност мора да биде внимателно одредено и дека шефот на претседателската канцеларија Андриј Ермак не треба да ја игра улогата на министер за надворешни работи.
„Ќе мине време и Украина ќе стане слободна, независна и силна држава, а акцентот на ЕУ ќе се помести кон Источна Европа“, порача Станчев.
